STUDIMI: Ata që hanë mish kanë më shumë mundësi të jetojnë deri në 100 vjeç

Një studim i gjerë i kryer në Kinë mbi jetëgjatësinë sugjeron se gratë shumë të moshuara që konsumojnë mish mund të kenë një probabilitet më të lartë për të arritur moshën 100 vjeç, krahasuar me ato që ndjekin një dietë vegjetariane.

Megjithatë, studiuesit theksojnë se kjo lidhje është vërejtur kryesisht tek personat nën peshë dhe nuk shfaqet te individët me peshë normale apo mbipeshë.

Hulumtimi është bazuar në të dhënat e më shumë se 5,000 personave mbi 80 vjeç, duke krahasuar njëqindvjeçarët me jo njëqindvjeçarët. Sipas rezultateve, tek gratë nën peshë, konsumi i përditshëm i mishit lidhej me deri në 44% më shumë gjasa për të arritur moshën 100 vjeç.

Nga ana tjetër, vegjetarianët që konsumonin vezë, bulmet ose peshk nuk treguan dallime të rëndësishme në jetëgjatësi krahasuar me ata që konsumonin mish.

Studiuesit theksojnë se indeksi i masës trupore (BMI) mund të ketë rol të rëndësishëm në këtë lidhje, duke sugjeruar se mungesa e kalorive dhe proteinave tek të moshuarit mund të ndikojë negativisht në shëndet dhe jetëgjatësi. Ata shtojnë se rezultatet tregojnë vetëm lidhje statistikore, jo shkakësore.

Ekspertët paralajmërojnë gjithashtu se studimi nuk merr parasysh ndryshimet afatgjata të dietës dhe faktorë të tjerë si aktiviteti fizik apo kushtet sociale.

Në përfundim, studiuesit sugjerojnë se një dietë e balancuar me ushqime bimore dhe shtazore në sasi të moderuar mund të jetë më e favorshme për plakje të shëndetshme.

Studimi është publikuar në American Journal of Clinical Nutrition.

"KORÇA BOOM"