Transporti publik në Shqipëri kthehet në duart e shtetit, nis projekti “MobAl”

Në programin qeverisës të miratuar më 18 shtator, Qeveria ka bërë të ditur planet për rikthimin e transportit publik nga shërbim privat në shtetëror gjatë mandatit të katërt. Ky projekt ambicioz parashikon krijimin e shoqërisë shtetërore “MobAl” – Agjencia Kombëtare për Transportin Publik.

Agjencia e re do të ketë në fokus fillimisht transportin e nxënësve drejt shkollave, duke synuar uljen e braktisjes së arsimit dhe reduktimin e pabarazive territoriale. Për më tepër, “MobAl” do të ofrojë shërbime në 7 itinerare turistike kombëtare, duke mbështetur industrinë e turizmit dhe krijimin e vendeve të punës.

Përveç kësaj, qeveria planifikon të implementojë një sistem biletash elektronikë që do të garantojë transparencë dhe besueshmëri në shërbim. Një tjetër element i rëndësishëm është zëvendësimi i flotës aktuale me rreth 100 autobusë elektrikë, të cilët do të jenë më efikasë, më të sigurt dhe më miqësorë me mjedisin.

Kjo iniciativë synon të sjellë një transformim të rëndësishëm në sektorin e transportit publik në Shqipëri, duke përmirësuar shërbimet për qytetarët dhe duke mbështetur zhvillimin ekonomik dhe social të vendit.

“KORÇA BOOM”