Transportonte lëndë drusore pa leje – procedohet penalisht 47-vjeçari në Maliq

Një tjetër rast i shkeljes së ligjit për mbrojtjen e pyjeve është evidentuar nga Policia e Maliqit. Specialistët për Hetimin e Krimeve në Komisariatin e Policisë Maliq kanë referuar materialet në Prokurori, ku ka nisur procedimi penal për shtetasin N. H., 47 vjeç, banues në Libonik.

Ky shtetas u kap nga shërbimet e policisë duke transportuar një sasi prej 6 metër kub dru, të prerë në mënyrë të paligjshme, në kundërshtim me ligjin për mbrojtjen e fondit pyjor. Lënda drusore u sekuestrua menjëherë në cilësinë e provës materiale.

Policia thekson se do të vijojë kontrollet intensive në gjithë territorin për të parandaluar dhe ndëshkuar çdo rast të paligjshëm të prerjes dhe transportit të druve, duke mbrojtur kështu pasurinë natyrore dhe ambientin. Autoritetet u bëjnë thirrje qytetarëve të respektojnë legjislacionin në fuqi dhe të denoncojnë rastet e ngjashme.

“KORÇA BOOM”