Vinjola Rota Drejtoresha e DRAP Korçë: Ishte kënaqësi e veçantë të isha sot, në këtë ditë që shënon fillimin e një viti të ri akademik

Ishte kënaqësi e veçantë të isha sot, në këtë ditë që shënon fillimin e një viti të ri akademik/ Një moment që sjell gjithmonë emocion, frymë të re dhe besim te forca e dijes.

Universiteti “Fan S. Noli” është prej vitesh një qendër e rëndësishme e mendimit dhe formimit profesional në qytetin tonë.

Ai përgatit breza të rinj që do të japin kontribut në fusha të ndryshme të jetës, në arsim, shkencë, kulturë e ekonomi.

Si drejtuese DRAP Korçë, por edhe si mësuese dhe ish-studente e këtij universiteti, ndjej krenari për këtë mision të përbashkët që na lidh: përgatitjen e nxënësve dhe studentëve të brezit të ri.

Në shkollat tona, mësuesit janë ura që lidhin dijen me jetën dhe frymëzimin për të ardhmen. Përgatitja që ata marrin sot në universitet reflektohet nesër në cilësinë e çdo klase dhe në formimin e çdo nxënësi. Prandaj, bashkëpunimi i ngushtë mes arsimit parauniversitar dhe atij universitar është thelbësor për të ndërtuar një sistem arsimor të fortë e të qëndrueshëm.

Studentet jane shpresa dhe energjia e së ardhmes. Kjo është koha e tyre për të mësuar, për të kërkuar dhe për të ndërtuar rrugën e tyre me pasion e përkushtim.

Asgjë nuk është më fisnike se përpjekja për të ditur dhe për të ndihmuar të tjerët për të mësuar.

Në këtë fillim të vitit akademik, ju uroj të gjithëve mbarësi, kurajë dhe suksese.

Le të jetë ky vit një hap i sigurt drejt dijes me vlera dhe një arsimi që e ndriçon njeriun.

“KORÇA BOOM”