Zero City Lab në Korçë: Thirrje për grante deri në 50,000 Euro për ide të gjelbra

Në Bibliotekën “Thimi Mitko” në Korçë është zhvilluar një tryezë bashkëpunimi në kuadër të programit Zero City Lab, një iniciativë që ka për qëllim të afrojë aktorët lokalë në drejtim të zgjidhjeve të qëndrueshme për menaxhimin e mbetjeve dhe zhvillimin e ekonomisë qarkulluese.

Në këtë takim morën pjesë përfaqësues të institucioneve vendore, universiteteve, sipërmarrjeve dhe shoqërisë civile, të cilët diskutuan mbi sfidat dhe mundësitë për bashkëpunim në sektorë me rëndësi si bujqësia, turizmi dhe industria e tekstileve.

Programi Zero City Lab synon të promovojë përdorimin më efikas të burimeve natyrore, të nxisë riciklimin dhe të sjellë ide inovative që kontribuojnë në zhvillimin e qëndrueshëm të komuniteteve urbane.

Një nga elementët më të rëndësishëm të programit është hapja e një thirrjeje për grante, e cila pritet të lançohet së shpejti. Bizneset vendore do të kenë mundësinë të aplikojnë për mbështetje financiare deri në 50,000 euro, për projekte që sjellin ndikim pozitiv për mjedisin dhe komunitetin.

Bashkia e Korçës ka shprehur mbështetje të plotë për këtë nismë, duke theksuar se çdo projekt që kontribuon në zhvillim të qëndrueshëm dhe rritje ekonomike përmes risive lokale do të ketë përkrahjen e saj.

Kjo tryezë konsiderohet një hap i rëndësishëm drejt bashkëpunimit të ngushtë ndërmjet sektorëve publikë dhe privatë, me synimin për të ndërtuar një të ardhme më të pastër, më të gjelbër dhe më të qëndrueshme për qytetin e Korçës.

“KORÇA BOOM”