A merrni barna të sigurta? Ja çfarë zbulon raporti i KLSH

Barnat për trajtimin e sëmundjeve tumorale në Shqipëri janë futur në treg pa iu nënshtruar analizave laboratorike të detyrueshme për cilësinë dhe përbërjen e tyre. Ky është një nga gjetjet më të rënda të raportit të fundit të Kontrollit të Lartë të Shtetit, që ngre alarmin për sigurinë farmaceutike në vend.

Sipas raportit, gjatë periudhës 2021–2024, Laboratori i Kontrollit pranë Agjencisë Kombëtare të Barnave dhe Pajisjeve Mjekësore nuk ka kryer asnjë analizë të plotë për barnat antitumorale. Madje, në vitin 2023 janë kryer vetëm tetë analiza gjithsej, nga të cilat vetëm katër për barnat e përdorura në spitale. Në tre muajt e parë të vitit 2025, është kryer vetëm një analizë.

Kjo përbën një shkelje serioze të ligjit dhe të detyrimeve që Agjencia ka për të garantuar sigurinë dhe efektivitetin e medikamenteve që qarkullojnë në treg. Pacientët që përballen me sëmundje të rënda, si kanceri, janë lënë pa garanci për cilësinë e barnave që marrin çdo ditë.

Përveç mungesës së analizave, Kontrolli i Lartë i Shtetit ka zbuluar edhe mungesën e plotë të një metodologjie të qartë për përzgjedhjen e mostrave, afatet për analizë dhe ndarjen e përgjegjësive mes stafit. Procesi teknik i kontrollit – nga marrja e mostrës, deri te publikimi i rezultateve – është kryer pa protokolle të dokumentuara dhe pa ndonjë standard të miratuar zyrtarisht.

Këto boshllëqe tregojnë për një dështim të thellë institucional dhe rrisin rrezikun për sigurinë e pacientëve, veçanërisht në rastin e trajtimeve të ndjeshme si ato për sëmundjet tumorale. Situata rikthen urgjencën për reformim në mekanizmat e kontrollit farmaceutik në vend.

“KORÇA BOOM”