Aksidenti i rëndë rëndohet bilanci, tre vikt*ma nga përplasja kokë më kokë

Bilanci i aksidentit tragjik të ndodhur mbrëmjen e së dielës, më 22 mars 2026, në rrugën e lumit të Vlorës është rënduar, duke shkuar në tre viktima.

Fillimisht, si pasojë e përplasjes kokë më kokë mes dy automjeteve, humbën jetën në vendngjarje dy drejtuesit e mjeteve: Adi Alushaj, rreth 30 vjeç, dhe Esat Brahimaj, rreth 40 vjeç. Ndërkohë, pasagjeri në njërin prej mjeteve, 40-vjeçari Andrea Begaj, u nxor nga automjeti në gjendje kritike dhe u transportua me urgjencë drejt spitalit, por nuk arriti t’u mbijetojë plagëve të marra dhe ndërroi jetë disa orë më vonë.

Në aksident u përfshinë një automjet tip “Benz” me targë FR4044C dhe një automjet tip “Ford” me targë AB309FL. Përplasja ka qenë tepër e fuqishme, duke shkaktuar dëmtime të rënda dhe shkatërrim pothuajse të plotë të pjesës ballore të të dy mjeteve.

Menjëherë pas ngjarjes, në vendngjarje mbërritën forcat e policisë, shërbimet zjarrfikëse dhe ambulancat, të cilat punuan për nxjerrjen e personave nga mjetet dhe për dhënien e ndihmës së parë. Për disa orë, zona u rrethua dhe qarkullimi u bllokua përkohësisht, për të mundësuar ndërhyrjen e shërbimeve emergjente dhe kryerjen e veprimeve hetimore.

Grupi hetimor ka nisur punën për zbardhjen e plotë të rrethanave të aksidentit. Dyshimet paraprake lidhen me faktorë si shpejtësia e lartë, parakalimi i gabuar ose humbja e kontrollit të njërit prej mjeteve, por shkaku i saktë pritet të përcaktohet nga hetimet zyrtare.

Ky aksident i rëndë rikthen edhe një herë vëmendjen te siguria rrugore në akset kombëtare, veçanërisht në zonat jashtë urbane, ku mungesa e ndriçimit, sinjalistika e pamjaftueshme dhe shpejtësia e lartë mbeten ndër faktorët kryesorë të rrezikut për drejtuesit e mjeteve.

“KORÇA BOOM”