Arrestohet në Vlorë Bertil Alliaj, i kërkuar për v*asjen e kushëririt në Gjorm

Pas mesnate, policia ka arrestuar Bertil Alliajn, autorin e dyshuar të vrasjes së kushëririt të tij, Dalan Alliaj, ngjarje që ndodhi në derën e banesës së viktimës në fshatin Gjorm të Selenicës.

Sipas të dhënave paraprake, Bertil Alliaj dyshohet se i është afruar kushëririt të tij dhe ka qëlluar drejt tij gjashtë herë me armë zjarri. Plumbat kanë qenë fatalë për 36-vjeçarin, i cili u dërgua menjëherë nga ambulanca në spitalin e Vlorës, por mjekët konstatuan se kishte humbur jetën.

Në vendngjarje mbërritën forca të shumta policie dhe grupi hetimor, që nisi menjëherë veprimet për zbardhjen e plotë të ngjarjes. Për kapjen e autorit u angazhuan forcat e rendit dhe njësitë e FNSH-së, të cilat arritën ta lokalizojnë dhe ta vënë në pranga pak orë pas krimit.

Bertil Alliaj është emër i njohur për drejtësinë, pasi rezulton i dënuar më parë për përfshirje në masakrën e Çoles të ndodhur në vitin 2015, ku mbetën të vrarë tre persona: Akil Hasanaj alias Haki Rakipi, Ardi Velaj dhe Albi Limaj

Ndërkohë, viktima Dalan Alliaj kishte një biznes në fshatin Levan të Fierit dhe rezulton pa precedentë penalë. Hetimet vazhdojnë për të përcaktuar motivet që çuan në këtë ngjarje të rëndë me pasoja fatale.

"KORCA BOOM"