Autoriteti Rrugor Shqiptar publikon projektin për segmentin alternativ Librazhd–Prenjas

Këtë të hënë, Autoriteti Rrugor Shqiptar (ARRSH) ka bërë publik për herë të parë projektin e ri për ndërtimin e një segmenti alternativ në aksin Librazhd–Prenjas, i cili prej disa ditësh është i bllokuar si pasojë e shembjes së rrugës.

Në një video të shpërndarë nga vetë ARRSH, bëhet e ditur se janë hartuar dhe miratuar masa emergjente për përballimin e situatës dhe rikthimin sa më të shpejtë të qarkullimit.

Projekti parashikon ndërtimin e një segmenti alternativ prej 1.3 kilometrash përgjatë Lumi Shkumbin, paralel me trasenë ekzistuese hekurudhore, duke shmangur zonën e dëmtuar dhe pjesët më të rrezikshme të aksit.

Për realizimin e këtij segmenti janë ndërmarrë disa veprime të rëndësishme inxhinierike, përfshirë devijimin e përkohshëm të rrjedhës së lumit për të mbrojtur infrastrukturën rrugore, rregullimin e urës së dëmtuar si dhe ndërhyrje për lehtësimin e ngarkesës në trupin e rrugës që ka pësuar rrëshqitje.

Sipas propozimeve paraprake, rruga alternative do të ofrojë një zgjidhje të përkohshme për qarkullimin e automjeteve, ndërsa paralelisht po kryhen analiza nga Shërbimi Gjeologjik Shqiptar për të vlerësuar mundësinë e rikonstruksionit të segmentit të dëmtuar.

Ndërkohë, në zonën e njohur si “Arrat e Gurrës” vijon puna për evakuimin e qindra metrave kub dhera dhe inertesh nga shpati i dëmtuar, me synim stabilizimin e masivit dhe rikthimin e ekuilibrit të skarpateve.

Po ashtu, në bashkëpunim me Operatori i Sistemit të Transmetimit (OST) dhe Operatori i Sistemit të Shpërndarjes (OSSH), janë kryer ndërhyrje për demontimin e shtyllave të tensionit të lartë dhe të ulët që janë prekur nga rrëshqitja e dherave. Punimet janë koordinuar edhe me Policinë e Shtetit për të garantuar sigurinë gjatë lëvizjes së mjeteve në zonë.

Kujtojmë se aksi Librazhd–Prenjas ka mbetur i mbyllur që prej datës 1 shkurt, duke shkaktuar vështirësi të konsiderueshme në qarkullimin rrugor dhe devijim të trafikut në rrugë alternative. Autoritetet bëjnë me dije se puna do të vijojë me intensitet për rikthimin sa më të shpejtë të normalitetit në këtë segment të rëndësishëm rrugor.

"KORCA BOOM"