BSH: Shtimi i të ardhurave buxhetore po vjen kryesisht nga rritja e pagave

Rritja e të ardhurave buxhetore këtë vit po mbështetet në masën dërrmuese te rritja e pagave.

Në analizën e treguesve fiskalë për nëntë muajt e parë të vitit, Banka e Shqipërisë vëren se struktura e rritjes së të ardhurave nuk ka shfaqur ndryshime të mëdha përgjatë vitit dhe në vijimësi rritja e tyre është mbështetur në masën më të madhe (rreth 82%) te të ardhurat nga sigurimet shoqërore dhe tek zgjerimi i të ardhurave nga tatimi mbi të ardhurat personale.

Sipas bankës Qendrore, ritmet e larta të rritjes së këtij të fundit reflektojnë kryesisht rritjen e pagave në sektorin publik e privat.

Në fund të nëntë muajve të parë të vitit, të ardhurat arritën një nivel prej 562.5 miliardë lekësh, rreth 6.4% më të lartë se e njëjta periudhë një vit më parë.

Ndërsa niveli i shpenzimeve rezultoi rreth 515.5 miliardë lekë, ose rreth 12.2% më i lartë nga e njëjta periudhë një vit më parë. Pavarësisht ngadalësimit në tremujorin e tretë, profili i rritjes së shpenzimeve nuk pësoi ndryshime thelbësore përgjatë vitit. Një e treta e rritjes së shpenzimeve erdhi nga shpenzimet për sigurime sociale, për shkak të peshës së lartë që ka skema e pensioneve në totalin e shpenzimeve buxhetore. Zërat e tjerë me kontribut të qëndrueshëm në rritjen e totalit ishin shpenzimet për personelin, si pasojë e politikës së qeverisë për rritjen e pagave në sektorin publik, shpenzimet për pushtetin lokal dhe ato për investime.

Të dhënat tregojnë se edhe këtë vit buxheti ngelet në suficit të bollshëm. Në fund të 9-mujorit, balanca buxhetore ishte pozitive, në rreth 47 miliardë lekë, ose rreth 2.4% e PBB-së. Edhe në tremujorin e tretë, buxheti rezultoi në suficit, me rreth 14 miliardë lekë.

Megjithatë, për 9-mujorin suficiti është më i ulët krahasuar me vlerat e shënuara në të njëjtën periudhë një vit më parë.

Pavarësisht suficitit, qeveria ka vijuar me ritmet e parashikuara programin vjetor të huamarrjes.

Për nëntë muajt e parë të vitit, huamarrja e brendshme u shtua me 26.4 miliardë lekë, nën frymën e një strategjie për reduktimin e huamarrjes në instrumente afatshkurtër, përkundrejt shtimit të atyre afatgjatë. Në terma të aktorëve, struktura e financimit të brendshëm mbeti thuajse e ngjashme përgjatë vitit, ku peshën kryesore, me rreth 70%, e mbart sektori bankar.

Ndërkohë, për nëntë muajt e parë të vitit, huamarrja neto në tregun e huaj rezultoi rreth 30 miliardë lekë, ku ndikimin kryesor në shtimin e saj e pati emetimi i Eurobondit, prej 650 milionë eurosh, shkurt të këtij viti. Tepricat e likuiditetit në valutë të disponuara aktualisht nga qeveria u përdoren për shlyerjen, në muajin tetor, të pjesës së mbetur prej 367 milionë eurosh të Eurobondit të emetuar në vitin 2018. Akumulimi i likuiditetit të qeverisë ka qenë i lartë edhe në monedhën vendase, si pasojë e suficiteve fiskale të shënuara përgjatë gjithë 9-mujorit./ Monitor

“KORÇA BOOM”