Dashuri, gjak dhe zjarr në Pogradec: E vërteta e errët: "E doja por më rrihte"- pas një bashkëjetese që përfundoi në tragjedi, ja arsyeja sipas autorit

Detaje tronditëse kanë dalë në dritë nga ngjarja makabre që ndodhi disa ditë më parë në Pogradec, ku një 31-vjeçar vrau me thikë partneren e tij 52-vjeçare. Pas një bashkëjetese disa vjeçare, marrëdhënia e tyre mori fund në mënyrën më brutale të mundshme, me një akt dhune që tronditi opinionin publik.

Autori, menjëherë pas krimit, u përpoq të zhdukte çdo provë. Ai pastrroi gjakun në banesë, la vendin e ngjarjes të rregulluar dhe më pas i vuri zjarrin apartamentit ku kishin jetuar bashkë. Por ky veprim nuk e shpëtoi, përkundrazi, çoi hetuesit drejt të vërtetës.

Pamjet e kamerave të sigurisë që ndodhen pranë zonës së krimit ishin vendimtare.

Ato zbuluan lëvizjet e 31-vjeçarit para dhe pas krimit, duke rrëzuar përfundimisht pretendimin e tij se nuk ndodhej fare në qytet në atë moment.

Në fillim, ai mohoi gjithçka. Tha se kishte qenë në Korçë dhe se kur ishte kthyer, e kishte gjetur partneren të pajetë. Madje tentoi ta justifikonte praninë e gjakut në banesë me një shpjegim absurd – se mund të kishte therur ndonjë pulë, për shkak të obsesionit të viktimës për pastërtinë.

Gjatë marrjes në pyetje, ai shprehej se e donte dhe se diferenca në moshë nuk përbënte problem për të. Madje theksoi se vinte nga një familje e mirë dhe nuk mund të ishte vrasës.

Por përballja me provat filmike, dëmtimet që kishte marrë gjatë përleshjes, si dhe rikonstruksioni i ngjarjes në vendin e krimit e detyruan të dorëzohej. Pas shtatë orësh hetim, ai u thye dhe pranoi gjithçka.

Në dëshminë e tij, ai pretendoi se bashkëjetesa kishte nisur të përkeqësohej muajt e fundit, dhe se viktima ishte shpeshherë agresive, sidomos kur konsumonte alkool. Sipas tij, konflikti mes tyre kishte dalë jashtë kontrollit ditën fatale.

Ekspertiza mjeko-ligjore zbuloi se gruaja ishte goditur me thikë, një akt që tregon për një shpërthim dhune ekstrem. Pas vrasjes, ai tentoi të zhdukte çdo gjurmë, por pa sukses.

Ndaj tij është ngritur akuza për vrasje me dashje në rrethana cilësuese dhe shkatërrim të provave përmes zjarrvënies.

Autori do t’i nënshtrohet gjithashtu një vlerësimi psikologjik për të kuptuar gjendjen e tij mendore në momentin e krimit.

Hetimet vijojnë dhe pritet që ky rast të trajtohet si një nga ngjarjet më të rënda të dhunës në marrëdhënie intime në vitet e fundit në Shqipëri.

“KORÇA BOOM”