Detaje të reja nga vrasja, dyshohet për vrasës me pagesë

Detaje të reja janë zbuluar nga krimi që ndodhi mbrëmjen e kaluar në Shkodër, ku një 34-vjeçar me inicialet K.K. u ekzekutua në mënyrë të ftohtë pranë një lokali në zonën e Kinemasë.

Sipas burimeve nga grupi hetimor, dyshohet se vrasja është kryer nga një person i pajtuar me pagesë dhe se bëhet fjalë për një atentat të mirëmenduar dhe të organizuar në stil mafioz. Policia e Shkodrës konfirmon se ende nuk ka arritur të identifikojë autorët, ndërsa nuk përjashtohet asnjë pistë hetimore.

Nga dëshmitë paraprake rezulton se dy persona, të veshur me të zeza dhe që lëviznin me një motor, kanë ndjekur lëvizjet e viktimës për disa minuta. Fillimisht ata janë larguar nga zona dhe më pas janë rikthyer për të realizuar atentatin në momentin kur 34-vjeçari doli nga lokali dhe po i drejtohej automjetit të tij.

Kjo lëvizje dyshohet të ketë qenë pjesë e një plani të mirëorganizuar nga autorët, që mendohet se kanë qenë profesionistë. Viktima, K.K., nuk rezulton të ketë pasur precedentë penalë dhe, sipas burimeve, nuk ishte në ndjekje apo survejim nga strukturat ligjzbatuese. Ai jetonte dhe punonte në qytetin e Shkodrës, ku së bashku me të atin kishte në pronësi një firmë ndërtimi.

Së fundmi, kompania e tyre ishte e angazhuar në rikonstruksionin e Kinemasë së qytetit, pikërisht përballë vendit ku ndodhi edhe vrasja.

Grupi hetimor, në bashkëpunim me Prokurorinë e Shkodrës, vijon punën për zbardhjen e plotë të ngjarjes. Policia po analizon kamerat e sigurisë dhe po verifikon lëvizjet e fundit të viktimës në përpjekje për të identifikuar autorët dhe motivin e mundshëm të kësaj ngjarjeje që ka tronditur opinionin publik.

Vrasja ndodhi në një nga zonat më të frekuentuara të qytetit, ku ka prezencë të përhershme të forcave të rendit, gjë që e bën edhe më të rëndë dhe shqetësuese mënyrën si u realizua atentati.

“KORÇA BOOM”