Dhuratat e vjeshtës/ Kush janë të besuarit e Berishës që do huazohen te partia e Metës dhe grupi ‘miks’

Demokratët kanë menduar edhe për detajet, në rast të mosmarrëveshjeve që mund të krijohen si pasojë e përplasjeve, qoftë ideologjike apo edhe për çështje të tjera.

Megjithëse në zgjedhjet e 11 majit nuk arriti të marrë më shumë se 50 mandate deputetësh përmes atij që u pagëzua si koalicioni “Aleanca Shqipëria Madhështore”, opozita e drejtuar nga Sali Berisha ka llogaritur 3 grupe parlamentare. Grupi më i madh dhe më reali është ai i Partisë Demokratike, ndërsa dy grupet e tjera do të krijohen me një huazim deputetësh dhe rigrupim të atyre që pavarësisht se ishin në listën e koalicionit, i përkasin partive të vogla.

Me përjashtim të PL-së së Ilir Metës që kishte në listat e sigurta 4 kandidatë, duke prodhuar 4 mandate, PR e Mediut, PAA e Agron Dukës, PBDNJ e Vangjel Dules dhe PDIU e Shpëtim Idrizit kanë një përfasim vetëm me 1 deputet.

Kjo do të thotë se që të krijohen dy grupe të tjera parlamentare, përveç atij të PD-së që numëron 42 deputetë, demokratët e Berishës duhet të huazojnë minimalisht 6 deputetë, 3 për secilin grup, duke i dhënë mundësinë PL-së së Metës dhe grupimit tjetër, që janë një miksim emrash dhe siglash.

PL e Metës ka në Kuvendin e ri 4 deputetë që janë: Tedi Blushi, Brunilda Haxhiu, Erisa Xhixho dhe Edmond Haxhinasto.

Ndërkohë grupimi tjetër, ai që përfshin 4 sigla partish përfaqësohet nga Mesila Doda (PDIU), Vangjel Dule (PBDNJ), Artan Luku (PAA) dhe Fatmir Mediu (PR).

Në këto kushte, PD do të huazojë nga 3 emra për secilin grup. Nga burime brenda PD-së mësohet se emrat që mund të huazohen janë Ramadan Likaj dhe Kliti Hoti, deputetë të Qarkut të Shkodrës, Zija Ismaili i Qarkut të Beratit, Klodiana Çapja e Qarkut Elbasan, Manjola Luku dhe Arjan Ndoja nga Qarku Durrës, si dhe Fidel Kreka nga Qarku i Korçës, Kastriot Piroli nga Qarku i Lezhës apo edhe Besart Xhaferi nga Qarku i Tiranës.  Lista përmban më shumë emra se numri i huazimeve, por duket se kjo është një masë paraprake e demokratëve për të qenë të përgatitur për çdo skenar, që mund të pengonte në formalizimin e dy grupimeve të tjera parlamentare.

Këto emra, sipas demokratëve, që pritet t’i ‘dhurohen’ PL-së së Metës dhe grupimit ‘miks’ do të jenë formalisht anëtarë të tyre, pasi ato mbeten pjesë e PD-së. Dhe duket se demokratët kanë menduar edhe për detajet, në rast të mosmarrëveshjeve që mund të krijohen si pasojë e përplasjeve, qoftë ideologjike apo edhe për çështje të tjera. Në këtë kuadër, duket se është menduar se nëse Doda e PDIU dhe Dule i PBDNJ nuk do të jenë në një grupim, atëherë ky i fundit mund t’I bashkohet grupimit të PL së Metës, duke e çuar numrin në 5, çka do të thotë se demokratët mund të huazojnë vetëm dy emra. Ndërkohë që grupimit ‘miks’ në këtë rast do t’I huazohen 4 emra.

Çfarë parashikon Rregullorja e Kuvendit

Grupi parlamentar formohet nga jo më pak se 7 deputetë. Çdo deputet mund të jetë anëtar vetëm në një grup parlamentar.

Kur numri i deputetëve të një grupi parlamentar bie nën numrin e parashikuar nga pika 6 e këtij neni, grupi pushon së ekzistuari.

Çdo deputet ka të drejtë të largohet nga grupi parlamentar. Deputeti i paraqet një deklaratë me shkrim kryesisë së grupit parlamentar nga i cili largohet dhe Kryetarit të Kuvendit, i cili njofton në seancën më të parë. Deputeti që largohet nga një grupi parlamentar, mund t’i bashkohet një grupi parlamentar vetëm pas gjashtë muajve nga data e largimit.

Kryetari i grupit parlamentar, brenda një jave nga formimi i grupit, dorëzon një deklarim me shkrim te Kryetari i Kuvendit për pozicionimin politik të grupit parlamentar “pro” ose “kundër” subjektit politik/koalicionit qeverisës.

Nëse pozicioni politik i një subjekti politik ndryshon gjatë legjislaturës, ndryshimi dokumentohet nga një deklarim i ri. Kryetari i Kuvendit njofton në seancën më të parë plenare për çdo deklarim në lidhje me pozicionin politik.

Çdo grup parlamentar, në mbledhjen e tij të parë, zgjedh kryesinë e tij. Kryesia e grupit përbëhet nga kryetari, zëvendëskryetari, sekretari dhe/ose zëdhënësi. Në mungesë të kryetarit të grupit, ai përfaqësohet nga zëvendëskryetari.

Për zgjedhjen e kryesisë, si dhe për çdo ndryshim të mëvonshëm të përbërjes së grupeve parlamentare ose kryesive të tyre, vihet në dijeni Kryetari i Kuvendit.

Kryetari i Kuvendit zhvillon takim me kryetarët e grupeve parlamentare me qëllim përcaktimin e vendeve të grupeve parlamentare në sallën e Kuvendit. Vendet e deputetëve të secilit grup parlamentar përcaktohen nga kryetari i secilit grup.

Grupet parlamentare miratojnë rregulloren e brendshme të organizimit të tyre.

Grupeve parlamentare u sigurohen mjediset e punës dhe pajisjet e nevojshme për funksionimin e tyre.

Çdo grupi parlamentar i vihet në dispozicion staf politik mbështetës në proporcion me madhësinë e grupit parlamentar, sipas numrit dhe pozicionit të përcaktuar me vendim të Byrosë së Kuvendit/ Pamfleti

“KORÇA BOOM”