“Dal i buzëqeshur, por jam i thyer”/ Gjesti rrëfen dhimbjen për humbjen e vëllait: Ankthi më ka ndryshuar jetën

“Dal i buzëqeshur, por jam i thyer”/ Gjesti rrëfen dhimbjen për humbjen e vëllait: Ankthi më ka ndryshuar jetën

Në daljen e tij të parë televizive pas humbjes tragjike të vëllait, Gjesti ka emocionuar publikun me rrëfimin e ndjerë në emisionin Goca dhe Gra.

Fituesi i “Big Brother VIP 4” foli mes lotësh për periudhën e vështirë që po kalon, duke treguar se pas buzëqeshjes që shfaq në publik fshihet një gjendje e rënduar emocionale dhe ankthi i vazhdueshëm.

“Jam i thyer në 2 mijë copa. Edhe pse dal në kamera, videoklipe apo rrjete sociale i buzëqeshur, nuk dua t’u jap njerëzve negativitet. Por brenda vetes jam shumë i rënduar”, u shpreh ai.

Gjesti tregoi se humbja e vëllait e ka ndryshuar plotësisht si njeri, duke ndikuar në mënyrën si mendon, sillet dhe e sheh jetën. Ai tha se pas ngjarjes ka filluar të vuajë nga ankthi dhe se shpesh përjeton gjendje të forta emocionale, edhe në momentet kur përpiqet të vazhdojë normalisht aktivitetet e tij artistike.

Artisti rrëfeu edhe një episod të fundit gjatë një koncerti, ku tha se ndjeu një gjendje të rëndë ankthi teksa po ndante fitimet me ekipin e tij.

“Paraja nuk të bën të lumtur. Më kapi ankthi, zemra, trupi më dridhej dhe nuk arrija të flija”, tregoi ai.

Në rrëfimin e tij, Gjesti tha se kjo periudhë e ka afruar më shumë me besimin dhe Zotin, duke theksuar se vetëm besimi e ka ndihmuar të përballet me dhimbjen.

Ai u ndal edhe tek kujtimet për të vëllanë, duke treguar se e ndjen praninë e tij kudo dhe se shumë nga gjestet, mënyra e të folurit dhe sjelljet e tij i kujtojnë vazhdimisht atë.

“Kudo ku jam unë, është edhe ai. Ishim shumë të njëjtë”, tha mes emocionesh artisti.

Rrëfimi i Gjestit ka prekur ndjekësit në rrjetet sociale, të cilët kanë reaguar me mesazhe mbështetjeje dhe ngushëllimi për artistin në këtë moment të vështirë të jetës së tij.

"KORÇA BOOM"