Emanuela Rusta vendos drejtësi në Islandë-Francë

Shqipëria përfaqësohet denjësisht në UEFA Women’s Nations League, ku katër gjyqtare shqiptare do të jenë në qendër të vëmendjes gjatë sfidës mes Islandës dhe Francës.

Emanuela Rusta është caktuar si arbitre kryesore për këtë ndeshje të rëndësishme të kompeticionit europian për femra, duke konfirmuar vlerësimin që ajo dhe stafi shqiptar i arbitrimit gëzojnë në nivelet më të larta të futbollit ndërkombëtar.

Në krah të saj do të jenë Mirjeta Salla dhe Edjena Kapxhiu si asistente të linjave, ndërsa roli i arbitres së katërt i është besuar Eglantina Pjetrushajt. Ky përfaqësim i plotë nga Shqipëria është një arritje e veçantë për gjyqësinë shqiptare dhe një tregues i qartë i përparimit të saj në arenën europiane.

Përballja Islandë–Francë pritet të jetë një ndeshje e fortë dhe me shumë interes, ndaj prania e një skuadre shqiptare të arbitrazhit në këtë takim përbën një moment krenarie për futbollin dhe sportin shqiptar në përgjithësi.

Ky delegim i rëndësishëm vjen si rezultat i përkushtimit, profesionalizmit dhe standardeve të larta që këto gjyqtare kanë treguar gjatë viteve të fundit, si në garat kombëtare ashtu edhe në ato ndërkombëtare.

“KORÇA BOOM”