Erion Veliaj: Nuk jam njoftuar zyrtarisht për procedurën e shkarkimit, nuk më është dhënë e drejta për mbrojtje

Kryetari i Bashkisë së Tiranës, Erion Veliaj, i është përgjigjur përmes një shkrese zyrtare Këshillit Bashkiak në lidhje me procedurën e iniciuar për shkarkimin e tij, që pritet të shqyrtohet në mbledhjen e thirrur për ditën e nesërme.

Në dokumentin e firmosur prej tij, Veliaj thekson se nuk është informuar në mënyrë zyrtare nga sekretari i Këshillit Bashkiak për zhvillimin e mbledhjes, duke u njohur me këtë zhvillim vetëm përmes mediave.

Sipas Veliajt, ai nuk është vënë në dijeni për materialet mbi të cilat është mbështetur kërkesa për shkarkim, çka sipas tij cenon të drejtën kushtetuese për t’u mbrojtur.

“Ende sot, një ditë përpara vendimmarrjes së Këshillit Bashkiak, nuk jam informuar zyrtarisht lidhur me mbajtjen e një mbledhjeje ku do të shqyrtohet shkarkimi im si Kryetar Bashkie. Nuk jam njoftuar për shkaqet e shkarkimit, materialet që më ngarkojnë me përgjegjësi, sqarimet përkatëse nga ana e Këshillit, apo mundësinë për të paraqitur sqarimet dhe provat e mia lidhur me shkeljen e pretenduar dhe dokumentacionin përkatës,” shkruan Veliaj.

Ai thekson se mungesa e transparencës dhe mosinformimi e kanë bërë të pamundur pjesëmarrjen e tij në proces dhe ushtrimin e së drejtës për t’u dëgjuar nga organi vendimmarrës, qoftë fizikisht, qoftë në mënyrë të shkruar.

“Si rrjedhojë, nuk më është krijuar mundësia për t’u mbrojtur, për të dhënë shpjegime apo për t’u dëgjuar nga ky organ kolegjial – as fizikisht, as me shkrim – për më tepër kur ndodhem në kushte paraburgimi, për shkak të një mase sigurie personale, dhe kam mundësi të kufizuara,” vijon më tej ai në shkresën drejtuar Këshillit.

Mbledhja e Këshillit Bashkiak për shqyrtimin e shkarkimit të Erion Veliajt është parashikuar të zhvillohet nesër, ndërkohë që kjo shkresë nënvizon mungesën e transparencës dhe njoftimit zyrtar nga ana e institucionit vendimmarrës.

“KORÇA BOOM”