Fshihej me arsenal armësh/ Policia arreston bashkëpunëtorin e Ramadan Zotos
- Korca Boom
- Aug 22
- 1 min read
Në qytetin e Fierit, u arrestua A. I, 50 vjeç, i cili jo vetëm kishte qenë më parë i shpallur në kërkim për armëmbajtje pa leje, por edhe ndihmonte në fshehjen dhe strehimin e një shtetasi tjetër të shumëkërkuar nga Policia. Ky i fundit, pas një konflikti me armë zjarri në Sarandë më 17 korrik, kishte plagosur dy persona dhe ishte arratisur.
Në banesën e A. I, e cila shërbente si vendstrehim për të kërkuarin, u ushtrua një kontroll i imtësishëm nga Policia, ku u zbulua një arsenal i vërtetë armësh. U sekuestruan tre pistoleta me karikatorë dhe fishekë, një armë automatike, një pjesë mekanizmi për silenciator, një dylbi nate, një dron dhe rreth 600 fishekë luftarakë.
Pas kontrollit, u konfirmua se në këtë banesë strehohej Ramadan Zoto, 43 vjeç, i shpallur në kërkim për tentativë vrasjeje dhe armëmbajtje pa leje. Ai u arrestua më pas në Korçë, ku iu gjet një armë zjarri pistoletë me fishek në fole, gati për qitje. Ndaj tij ishte caktuar më parë masa e sigurisë "arrest në burg" nga Gjykata e Sarandës.
A. I tani përballet me akuza serioze për strehimin e një personi të kërkuar dhe për mbajtjen e arsenalit të armëve në banesë. Hetimet vazhdojnë për të zbardhur plotësisht lidhjet mes të dyshuarve dhe për të identifikuar çdo person tjetër të përfshirë në ngjarje.
“KORÇA BOOM”



















