Gazetarët sportivë të qarkut marrin mirënjohjen që u takon, për dekada përkushtimi në shërbim të sportit dhe informimit publik

Në prag të sfidës së radhës ndaj Elbasanit, e cila do të luhet të shtunën, klubi i Vllaznisë ka zhvilluar një veprimtari të veçantë për të nderuar figurat e gazetarisë sportive në Shkodër. Pesë emra të njohur të këtij profesioni, që kanë dhënë një kontribut të çmuar ndër vite, janë vlerësuar me "Certifikata Mirënjohjeje".

Në një ceremoni të organizuar në ambientet e stadiumit “Loro Boriçi”, në bashkëpunim me Këshillin e Qarkut Shkodër, janë dorëzuar këto vlerësime për gazetarët:

• Ymer Striniqi,

• Ramadan Bigza

• Mejdan Zhivani (të tre pas vdekjes), si dhe për:

• Namik Mehmeti dhe

• Gaspër Marku

  
  

KF Vllaznia ka bërë me dije se propozimi për këto vlerësime është bërë nga vetë klubi dhe është miratuar nga Këshilli i Qarkut. Në njoftimin zyrtar thuhet:

“Kontributi i tyre i madh për gjithçka ka ndodhur në botën e futbollit dhe jo vetëm, mbetet i jashtëzakonshëm dhe një vlerësim i tillë është minimumi që mund të bëjmë për ta.”

Ky është një gjest simbolik, por me shumë peshë njerëzore dhe profesionale, që nxjerr në pah respektin dhe mirënjohjen ndaj figurave që me punën e tyre kanë pasqyruar sportin dhe Vllazninë ndër vite.

“KORÇA BOOM”