Gëzuar ditëlindjen, Dr. Ylli Ciko, një prej emrave më të njohur të mjekësisë në Korçë!

Gëzuar ditëlindjen, Dr. Ylli Ciko, një prej emrave më të njohur të mjekësisë në Korçë, i cili për më shumë se pesë dekada i ka shërbyer me përkushtim shëndetit të qytetarëve, arsimit universitar dhe zhvillimit të shkencës mjekësore.

I lindur më 1 korrik 1951 në Korçë, ai u diplomua në Fakultetin e Mjekësisë të Universitetit të Tiranës për mjekësi të përgjithshme dhe më pas u specializua si kirurg i përgjithshëm e kirurg i specializuar. Karriera e tij përfshin drejtimin e Spitalit Ushtarak të Divizionit të Korçës, punën si specialist dhe punonjës shkencor në Institutin e Kërkimeve të Mjekësisë Ushtarake, si edhe realizimin e studimeve shkencore në fushën e traumave nga armët e zjarrit.

Për vite me radhë ai ka qenë pedagog në Fakultetin e Mjekësisë, në Universitetin "Fan S. Noli" dhe në universitetin "Medicom", duke dhënë mësim në lëndë të rëndësishme si kirurgjia, anatomia, farmakologjia, traumatologjia, anestezi-reanimacioni dhe terminologjia mjekësore.

Njëkohësisht ka hartuar tekste mësimore dhe ka kontribuar në përgatitjen e brezave të shumtë të infermierëve dhe profesionistëve të rinj të shëndetësisë.

Dr. Ciko ka vijuar formimin profesional edhe jashtë vendit, duke kryer specializime në Greqi dhe më pas në onkologji pranë QSUT-së. Si kirurg onkolog në Spitalin Rajonal të Korçës, ai ka dhënë një kontribut të rëndësishëm në diagnostikimin dhe trajtimin e sëmundjeve tumorale, ndërsa ka qenë gjithashtu i angazhuar në trajnimin e personelit shëndetësor dhe në fushata ndërgjegjësuese për zbulimin e hershëm të kancerit të gjirit.

Përkushtimi, profesionalizmi dhe kontributi i tij në mjekësi, kërkimin shkencor dhe arsimin universitar e kanë bërë Dr. Ylli Cikon një figurë të respektuar dhe të vlerësuar në komunitetin mjekësor dhe më gjerë.

Gëzuar 75-vjetorin, Dr. Ylli Ciko!

“KORÇA BOOM”