Ish-ushtaraku që furnizonte bandat me armë, kapet në taksi

Policia e Tiranës ka arrestuar ditën e sotme një 46-vjeçar, ish-ushtarak, pasi dyshohet se furnizonte me armë zjarri grupe kriminale në kryeqytet.

Personi i arrestuar është identifikuar si Altin Celami, banues në Tiranë. Ai u ndalua në Rrugën e Dibrës, ndërsa qarkullonte me taksinë e tij të verdhë, e cila, sipas hetimeve, përdorej për të shmangur kontrollet policore.

Gjatë kontrollit të automjetit dhe më pas në banesën e tij, forcat e policisë sekuestruan katër armë pistoletë, municion luftarak, lëndë narkotike të llojit kokainë, si dhe pjesë të ndryshme armësh, që dyshohet se do t’u shiteshin grupeve kriminale.

Burime nga hetimet bëjnë me dije se Celami kishte pak kohë që kishte dalë nga burgu dhe më parë ishte arrestuar në tetor të vitit 2022 për të njëjtën vepër penale. Ai kishte shërbyer më parë në repartin ushtarak të Pezë Helmës, por ishte përjashtuar nga shërbimi pas arrestimit të parë.

Materialet hetimore i janë kaluar Prokurorisë së Tiranës për vijimin e procedurave ligjore në ngarkim të 46-vjeçarit, i cili akuzohet për armëmbajtje pa leje, tregtim armësh dhe lëndësh narkotike.

"KORCA BOOM"