Italia hap dyert: 500 mijë punëtorë të huaj pritet të hyjnë deri në 2028

Qeveria italiane ka miratuar një plan të ri që parashikon hyrjen e rreth 500 mijë punëtorëve nga vendet jashtë Bashkimit Europian gjatë periudhës 2026–2028, në kuadër të dekretit të flukseve.

Sipas autoriteteve, kjo masë vjen si përgjigje ndaj mungesës strukturore të fuqisë punëtore në disa sektorë kyç të ekonomisë, si bujqësia, turizmi dhe shërbimet, ku bizneset italiane kanë raportuar vështirësi të vazhdueshme në gjetjen e stafit.

Në total, plani parashikon 497.550 kuota për punësim të huaj, të ndara në mënyrë progresive: 164.850 për vitin 2026, 165.850 për vitin 2027 dhe 166.850 për vitin 2028. Këto kuota synojnë të plotësojnë nevojat e tregut të punës dhe të stabilizojnë sektorët me mungesë punonjësish.

Një pjesë e rëndësishme e programit i dedikohet edhe punës së pavarur, ku parashikohen rreth 500 viza në vit për shtetas të huaj që dëshirojnë të zhvillojnë aktivitet ekonomik në Itali. Kjo kategori përfshin sipërmarrës me investime të konsiderueshme, profesionistë të licencuar në fusha të rregulluara, si dhe drejtues kompanish.

Përfitimi i vizës do të kushtëzohet nga plotësimi i kritereve ligjore, përfshirë kontrata pune me subjekte italiane ose dëshmi për kapacitete financiare dhe kushte strehimi në rastet e vetëpunësimit.

Me këtë vendim, Italia synon të balancojë nevojat e tregut të punës me politikat e migracionit, duke hapur njëkohësisht mundësi të reja për integrimin e punëtorëve të huaj në ekonominë e vendit.

“KORÇA BOOM”