Italia, Turqia apo Polonia në fund? Ja rruga që i duhet Shqipërisë drejt Botërorit

Fitorja e madhe ndaj Serbisë ka përmbysur situatën në grup dhe i ka dhënë Shqipërisë një shans real për të siguruar vendin e dytë, pozicion që çon në fazën “Play Off” për kualifikimin në Kampionatin Botëror.

Në qoftë se Shqipëria mposht Andorrën dhe Serbia nuk fiton në transfertë ndaj Anglisë, kuqezinjtë do të mbyllin matematikisht çështjen e vendit të dytë. Në rast se Serbia triumfon, atyre do t’u duhet një pikë në ndeshjen me Anglinë për të ruajtur pozitën.

Vendi i dytë nuk garanton kualifikim të drejtpërdrejtë. Kombëtarja kalon në fazën “Play Off”, ku 12 kombëtare ndahen në tre mini-turne dhe vetëm fituesit e secilit mini-turne sigurojnë vendin për në Botëror.

Sipas statistikave ndërkombëtare, grupet aktuale për “Play Off” janë:

• Vazo 1: Italia, Turqia, Ukraina, Polonia

• Vazo 2: Uellsi, Skocia, Hungaria, Republika Çeke

• Vazo 3: Sllovakia, Rumania, Shqipëria, Kosova

• Vazo 4: Suedia, Maqedonia e Veriut, Irlanda, Moldavia

  
  

Në këtë format, kombëtarja e Vazos 3 përballet në gjysmëfinale me një skuadër nga Vazo 2 — që do të thotë se Shqipëria mund të ndeshet me Uellsin, Skocinë, Hungarinë apo Republikën Çeke. Ndeshjet do të zhvillohen me eliminim direkt dhe, për shkak të koeficientit më të ulët, kuqezinjtë do të luajnë në transfertë.

Nëse kualifikohen në finale, stadiumi do të përcaktohet me short dhe ka mundësi që finalja të luhet në “Air Albania”. Në këtë fazë, Shqipëria do të përballet me fituesin midis Vazo 1 dhe Vazo 4, që do të thotë kundërshtarët e mundshëm janë: Italia, Turqia, Ukraina apo Polonia.

Rruga drejt Botërorit mbetet e vështirë, por me këtë fitore ndaj Serbisë, Kombëtarja shqiptare është më pranë se kurrë realizimit të ëndrrës së madhe.

“KORÇA BOOM”