Jam gocë serioze, dua të martohem një herë në jetë” – Besa rrëfen emocionet pas kurorëzimit

Ashtu siç ishte përfolur prej kohësh, këngëtarja Besa Kokëdhima është martuar javën e kaluar në një ceremoni private, mbajtur në bregdetin e Dhërmiut. Dasma u organizua me një numër të kufizuar të ftuarish dhe çifti kishte kërkuar paraprakisht që të mos postoheshin foto apo video në rrjetet sociale.

Megjithatë, pamjet nga ceremonia kanë rrjedhur, dhe ato zbulojnë edhe personin që i ka rrëmbyer zemrën Besës. Bëhet fjalë për Tedi Tase, menaxheri i saj prej vitesh, me të cilin ndan një histori dashurie të konsoliduar, por të mbajtur larg vëmendjes publike.

Në dasmë kanë qenë të pranishëm miq të afërt dhe figura të njohura nga bota e muzikës si Elvana Gjata me nënën e saj dhe kantautori Kledi Bahiti. Për atmosferën muzikore janë përkujdesur Anxhela Peristeri, Aurel Thellimi dhe dy artistë ndërkombëtarë.

Pas ceremonisë, Besa ka ndarë me ndjekësit e saj një foto ku shfaqet duke mbajtur dorën e partnerit, të dy me unazat e martesës, ndërsa është parë më pas në pushime në Mikonos me motrën dhe djalin e saj. Ato që fillimisht duken si ditë familjare, janë në fakt pushime luksoze në resortet më të njohura të ishullit grek.

Në dalje të mëparshme mediatike, Besa kishte treguar se ishte më e dashuruar se kurrë dhe se partneri i saj ishte mbështetja më e madhe në jetën dhe karrierën e saj. “Kur jam e stresuar, ai është i vetmi që më qetëson. Kuptimi i jetës për mua është dashuria”, kishte deklaruar këngëtarja. Ajo kishte lënë të kuptohej se dasma ishte shumë afër dhe kishte pohuar me entuziazëm se do të kishte më shumë se një fustan nusërie.

“KORÇA BOOM”