Kontrolle në Korçë e Pogradec, procedohen disa shtetas për shkelje tatimore dhe administrative

Gjatë kontrolleve të ushtruara nga strukturat përkatëse në Korçë, Pogradec dhe Ersekë, janë evidentuar disa raste të shkeljes së ligjit, ku disa shtetas u proceduan për mungesë dokumentacioni dhe ushtrim aktiviteti të paregjistruar.

Në fshatin Gurras, shtetasi K. B., 29 vjeç, si dhe në fshatin Vërdovë shtetasit L. B., 38 vjeç, dhe M. Xh., 28 vjeç, rezultuan se administronin biznese të paregjistruara në organet kompetente, duke shmangur kështu detyrimet ligjore.

Në aksin rrugor “Pogradec-Korçë”, gjatë kontrollit të një furgoni që i përkiste një subjekti tregtar, u konstatuan dhjetëra koli me pije freskuese dhe ujë të pashoqëruara me fatura tatimore. Administratori i subjektit, shtetasi E. S., 43 vjeç, banues në Pogradec, u procedua penalisht. Gjithashtu, u evidentua se shoferi i mjetit dhe një i mitur nuk ishin të siguruar në organet kompetente.

Ndërkohë, në qytetin e Ersekës, gjatë kontrollit të ushtruar në automjetin e shtetasit Xh. H., 61 vjeç, u gjetën disa produkte elektroshtëpiake të transportuara pa faturë tatimore, duke përbërë shkelje të ligjit fiskal.

Autoritetet deklaruan se kontrollet do të vijojnë në mënyrë të vazhdueshme për të parandaluar dhe ndëshkuar aktivitetet e paligjshme, si dhe për të garantuar konkurrencë të ndershme në treg.

“KORÇA BOOM”