Kostanca Koçi në drejtim të Unionit të Gazetarëve për rajonin e Korçës – Një frymë e re bashkëpunimi për komunitetin mediatik

Gazetarja e njohur e Radio Televizionit të Korçës, Kostanca Koçi, është zgjedhur kryetare e degës së Unionit të Gazetarëve Shqiptarë (UGSH) për rajonin juglindor, duke sjellë një qasje të re bashkëpunimi dhe përfaqësimi për punonjësit e medias në këtë zonë.

Në mbledhjen zgjedhore, ku morën pjesë gazetarë të rajonit dhe përfaqësues të strukturave qëndrore të UGSH, u zgjodh edhe gazetari Xhensil Shkëmbi si koordinator i degës, si dhe një bord drejtues me tre anëtarë, të cilët do të jenë pjesë e strukturës rajonale drejtuese të organizatës.

Në takim ishte i pranishëm edhe kreu i Unionit të Gazetarëve Shqiptarë, gazetari dhe analisti Aleksandër Çipa, i cili vlerësoi rëndësinë e këtij riorganizimi rajonal. Ai theksoi situatën sfiduese të medias në vend, veçanërisht në raport me kushtet sociale dhe të drejtat e gazetarëve, duke e cilësuar si një skandal të vazhdueshëm mungesën e zgjidhjes për çështje jetike si pagat dhe sigurimet shoqërore.

Çipa shprehu mbështetjen për strukturat e reja dhe theksoi rëndësinë e rrjetëzimit rajonal dhe ndërkombëtar të gazetarëve, si mënyrë për të rritur ndikimin dhe mbrojtjen profesionale të tyre.

Kostanca Koçi, me një përvojë të gjatë dhe të suksesshme në mediat audiovizive, është vlerësuar nga kolegët e saj si një figurë me integritet, përkushtim dhe aftësi përfaqësimi. Ajo u votua unanimisht nga pjesëmarrësit, duke marrë mbështetjen e plotë për të drejtuar degën e UGSH në një moment kyç për mediat lokale.

Zgjedhja e saj shihet si një hap pozitiv drejt forcimit të rolit të Unionit të Gazetarëve në rajonin e Korçës, me fokus në mbrojtjen e të drejtave të gazetarëve, përmirësimin e kushteve të punës dhe promovimin e etikës profesionale.

“KORÇA BOOM”