Krenaria e Pogradecit, Ermira Babaliu feston ditëlindjen, ja historia e saj artistike
Një nga zërat më të veçantë dhe më të dashur të muzikës shqiptare, këngëtarja e mirënjohur Ermira Babaliu, feston sot ditëlindjen. Me një karrierë të pasur artistike dhe një repertor që ka fituar zemrat e publikut ndër vite, ajo mbetet një nga emrat që i kanë dhënë identitet muzikës shqiptare dhe një krenari e veçantë për qytetin e Pogradecit.
E rritur në qytetin buzë liqenit, Ermira e shfaqi që në moshë të re talentin dhe dashurinë për muzikën. Edhe pse ndoqi studimet e larta në Institutin e Shkencave Politike, pasioni për këngën do të bëhej rrugëtimi që do ta shoqëronte gjatë gjithë jetës.
Hapat e saj të parë në skenë u shoqëruan me vlerësime dhe sukses. Një prej momenteve të rëndësishme në karrierën e saj ishte viti 1987, gjatë Takimit Kombëtar të Talenteve të Reja, ku u vlerësua me çmimin "Për interpretim me nivel të lartë ideo-artistik të këngëve rinore".
Me zërin karakteristik dhe interpretimin plot emocion, Ermira Babaliu arriti të krijojë një identitet të veçantë artistik, duke u bërë e dashur për publikun si në muzikën e lehtë shqiptare, ashtu edhe në interpretimin e serenatave.
Lidhja e saj me juglindjen është ruajtur edhe në jetën personale. Ajo është e martuar me Sandrin, me origjinë nga Korça, dhe së bashku kanë një vajzë, Dorelën.
Prej vitesh këngëtarja jeton në Shtetet e Bashkuara të Amerikës, por largësia nuk e ka shkëputur asnjëherë nga vendlindja dhe traditat e saj. Përmes këngëve dhe veçanërisht serenatave, Ermira vazhdon të përcjellë mallin për Shqipërinë dhe të mbajë gjallë një pjesë të çmuar të trashëgimisë muzikore të Pogradecit dhe Korçës.
Në këtë ditë të veçantë, urimet për artisten vijnë nga artdashësit dhe të gjithë ata që ndër vite kanë shijuar zërin dhe interpretimet e saj.
Gëzuar ditëlindjen, Ermira Babaliu! Edhe shumë vite të tjera me shëndet, lumturi, dashuri dhe këngë të bukura!
“KORÇA BOOM”
















