Kristaq Jorgji, figura korçare që i kushtoi jetën arsimit dhe pasionit për filatelinë

Sot, më 27 tetor, në përvjetorin e lindjes, kujtohet Kristaq Llambi Jorgji, një prej koleksionistëve të veçantë të Korçës, arsimtar i përkushtuar dhe figurë me kontribute të rëndësishme në jetën shoqërore e kulturore të qytetit.

I lindur në Korçë më 27 tetor 1932, Kristaq Jorgji kreu arsimin fillor dhe atë unik në qytetin e lindjes, për të vijuar më pas studimet në shkollën e mesme “Raqi Qirinxhi”, të cilën e përfundoi në vitin 1951. Pas studimeve në Institutin e Lartë Pedagogjik dhe Universitetin e Tiranës, ai nisi karrierën si drejtues shkolle në rrethin e Pogradecit.

Për dekada me radhë, Jorgji ia kushtoi jetën arsimit, duke punuar si mësues dhe duke mbajtur detyra drejtuese në institucione të ndryshme arsimore. Ndër to ishin Teknikumi Bujqësor “Irakli Tërova” dhe shkolla e Pojanit. Përveç punës me nxënësit dhe mësuesit, ai kontribuoi edhe në grupet e punës së Ministrisë së Arsimit për zhvillimin e sistemit arsimor.

Për meritat e tij në fushën e arsimit, u vlerësua me medaljen “Naim Frashëri” të klasit të III-të.

Edhe pas daljes në pension, Kristaq Jorgji vijoi të ishte aktiv në jetën publike dhe shoqërore. Në vitin 1999, ai u angazhua si vullnetar pranë Kryqit të Kuq Shqiptar, për të drejtuar më pas degën e Korçës deri në vitin 2010. Përmes këtij angazhimi, ai kontribuoi në shërbim të komunitetit dhe të njerëzve në nevojë.

Një tjetër pasion i rëndësishëm në jetën e tij ishte filatelia. Si kryetar i Shoqatës së Koleksionistëve të Shqipërisë, Jorgji luajti një rol në promovimin e koleksionimit, duke organizuar ekspozita në Korçë dhe në qytete të tjera të vendit.

Kristaq Llambi Jorgji kujtohet si një figurë që bashkoi përkushtimin ndaj dijes, përvojën në arsim, shërbimin qytetar dhe pasionin për koleksionimin. Kontributi i tij në formimin e brezave të rinj dhe në promovimin e filatelisë mbetet pjesë e trashëgimisë arsimore e kulturore të Korçës.

“KORÇA BOOM”