LAJM I TRISHTË/ Ndërron jetë mjeku i njohur!

*Njoftim!

Shërbimi i Neurokirurgjisë të Spitali Universitar të Traumës

Me hidhërim të thellë ndajmë lajmin për vdekjen e Prof. Agim Kolasit.

Prof Agimi është një figurë e njohur i mjekësisë shqiptare. Ai është njëri nga themeluesit e neurokirurgjisë shqiptare. I lindur në Kolonjë, të cilën gjithmonë e mbajti në mendje dhe në zemër, u shkollua ne fakultetin e mjekesise ne Tirane dhe ne vitet 1970 kreu specializim për neurokirurgji në Kinë. Menjëherë mbas kthimit në Shqipëri filloi të aplikonte me njohuritë e fituara në Spitalin Ushtarak.

Në vitin 1972, hapi repartin e Neurokirurgjisë në spitalin ushtarak, ku u realizuan për herë të parë në Shqipëri shumë operacione dhe metoda diagnostike. Dr. Agimi ka realizuar me mijëra operacione, po ashtu ai është autor i shumë studimeve që u bënë më pas udhërrëfyes për mjekët e rinj.

Jeta e tij ishte dëshmi se koha e njeriut nuk matet me vitet që jeton, por me gjurmët që lë në mendjet dhe zemrat e të tjerëve. Dhe ai la pas një trashëgimi që nuk do të shuhet: breza studentësh që do të mbajnë gjallë frymën e tij, kolegë që do të kujtojnë urtësinë e tij, dhe pacientë që do të ruajnë mirënjohjen për përkujdesjen e tij njerëzore. Ai jetoi dhe punoi sipas parimit të lashtë “Ars longa, vita brevis” – arti është i gjatë, jeta e shkurtër – duke e ditur se dija që ai ndërtonte do të jetonte përtej kufijve të kohës së tij.

Për të, profesioni nuk ishte thjesht detyrë, por mision: “Salus aegroti suprema lex esto” – shëndeti i pacientit le të jetë ligji më i lartë. Në çdo vendim, në çdo këshillë, ai e vendosi njeriun në qendër, duke dëshmuar se mjekësia pa humanizëm humbet kuptimin e saj.

Sot, ndërsa e përcjellim në përjetësi, e dimë se ai nuk largohet plotësisht. Sepse, siç thoshte vetë: “Njeriu jeton për aq kohë sa kujtohet me dashuri dhe nderim”.

U prehtë në paqe profesori ynë i dashur. Drita që ai ndezi në ne, do të vazhdojë të ndriçojë përherë.

Nga Prof. Ass. Fatos Olldashi Shefi i Shërbimit të Neurokirurgjisë në SUT.

“KORÇA BOOM”