Lasgush Poradeci, një jetë mes poezisë, natyrës dhe filozofisë

Llazar Gusho, i njohur me pseudonimin Lasgush Poradeci, lindi më 27 dhjetor 1899 dhe mbetet një nga figurat më të shquara të letërsisë shqipe të shekullit XX. Filolog, poet dhe përkthyes, ai konsiderohet një nga pionierët e letërsisë moderne shqipe, me një ndikim të drejtpërdrejtë në zhvillimin e saj, duke ndërthurur elemente të Romantizmit dhe Realizmit.

Lasgush Poradeci lindi në qytetin e Pogradecit, në brigjet e Liqenit të Ohrit, asokohe pjesë e Perandorisë Osmane. Arsimin fillor e kreu në një shkollë shqipe, ndërsa atë të mesëm në Manastir (Bitola). Studimet i vijoi në Athinë, në “Lycée Léonin”, për të vazhduar më pas studimet universitare në Bukuresht dhe Graz. Gjatë kësaj periudhe, ai krijoi dhe mbajti lidhje të ngushta me figura të shquara të letërsisë shqipe si Asdreni, Ernest Koliqi, Gjergj Fishta dhe Mitrush Kuteli.

Poradeci mbahet mend veçanërisht për vëllimet poetike “Vallja e yjve” dhe “Ylli i zemrës”, të cilat pasqyrojnë shpirtin shqiptar, natyrën, ndjenjën erotike dhe thellësinë filozofike. Poezia e tij shquhet për finesën gjuhësore, ndërtimin e kujdesshëm formal dhe ndjeshmërinë e veçantë estetike.

Për një periudhë të gjatë, ai punoi pranë Shtëpisë Botuese “8 Nëntori”, ku kontribuoi edhe si përkthyes, duke sjellë në shqip vepra të rëndësishme nga letërsia angleze, franceze, gjermane, italiane dhe ruse.

Lasgush Poradeci u nda nga jeta më 12 nëntor 1987, duke lënë pas një trashëgimi të çmuar në letërsinë dhe kulturën shqiptare.

"KORCA BOOM"