Miliarderët braktisin Dubain, fluturimet private trefishojnë çmimet

Çmimet e avionëve privatë kanë arritur nivele marramendëse, ndërsa të pasurit po kërkojnë çdo mundësi për t’u larguar nga Emiratet e Bashkuara Arabe. Një fluturim privat drejt Stamboll kushton deri në 85 mijë euro, ndërsa çarterat për në Moskë arrijnë në rreth 20 mijë euro për person. Nga Riad drejt Evropës, shifrat shkojnë deri në 350 mijë dollarë.

Kjo situatë ka ardhur pas sulmeve të Iranit dhe mbylljes së aeroportit në Dubai, duke krijuar një garë të vërtetë për largim. Qyteti i njohur për luksin dhe jetën e tij plot shkëlqim është përfshirë nga pasiguria, pasi dronët dhe raketat e lëshuara në kuadër të përshkallëzimit rajonal shkaktuan dëme dhe tension.

Ministria e Mbrojtjes e Emiratet e Bashkuara Arabe bëri të ditur se sistemet mbrojtëse kanë interceptuar raketa dhe dronë të tjerë, ndërsa autoritetet njoftuan edhe mbylljen e ambasadës në Teheran.

Me aeroportin e Dubait jashtë funksionit, shumë persona po udhëtojnë me makinë drejt Maskat në Oman, rreth katër orë e gjysmë larg. Aeroporti i Maskatit vazhdon operimin, por fluturimet komerciale drejt Evropës janë pothuajse të gjitha të rezervuara.

Operatorët e aviacionit privat raportojnë mungesë të theksuar avionësh, pasi shumë pronarë hezitojnë të operojnë në një rajon të tensionuar për shkak të rreziqeve dhe kushteve të sigurimit. Kërkesa e lartë dhe oferta e kufizuar kanë krijuar një treg emergjent, ku çmimet po rriten nga ora në orë, ndërsa situata në Lindjen e Mesme mbetet e paqëndrueshme.

"KORCA BOOM"