Misri i fermerëve të Maliqit mbetet stok, në treg shitet ai serb

Fermerët që kultivojnë drithëra në fshatin Sheqeras të Maliqit po përballen edhe këtë vit me mungesën e tregut për prodhimin e tyre. Më shumë se 60% e misrit të prodhuar ka mbetur i pashitur, ndërsa magazinat e fermerëve janë ende të mbushura me stok.

Fermeri Shkëlqim Malo tregon se pas korrjes së misrit në tetor të vitit 2025 arritën të shesin vetëm një pjesë të vogël të prodhimit. Pas kësaj periudhe, sipas tij, tregtarët nuk kanë shfaqur më interes për blerje. Aktualisht çmimi me shumicë i misrit varion nga 30 deri në 33 lekë për kilogram. Ndërkohë në treg qarkullon edhe misër i importuar, i cili shitet disi më lirë, por që sipas fermerëve nuk ka të njëjtën cilësi me prodhimin vendas.

Situata pritet të vështirësohet edhe më tej gjatë këtij sezoni bujqësor. Malo thotë se një pjesë e tokave të mbjella u përmbytën gjatë dimrit, duke shkaktuar dëme të konsiderueshme dhe duke ulur pritshmëritë për prodhimin e këtij viti.

Edhe fermeri Luftim Gishto ndodhet në të njëjtën situatë. Ai ka ende rreth 20 kuintalë misër të pashitur dhe thotë se po mendon të heqë dorë nga kultivimi i tokës, duke e dhënë atë me qira.

Sipas të dhënave të Drejtorisë së Bujqësisë, në fushën e Maliqit kultivohen mbi 3500 hektarë grurë, me një prodhim që arrin rreth 14 mijë tonë. Ndërsa sipërfaqja e mbjellë me misër është pothuajse e njëjtë, me një prodhim që shkon në rreth 24 mijë tonë.

Ndërkohë që prodhimi vendas i misrit ka mbetur stok, në tregun shqiptar vazhdon të qarkullojë misër i importuar. Një ditë më parë, Autoriteti Kombëtar i Ushqimit kallëzoi penalisht subjektin “Modi” në Shkodër, pasi u konstatua se kishte tregtuar 94.5 ton misër të importuar nga Serbia, të kontaminuar me aflatoksinë.

Fillimisht u bllokuan 104 ton misër, por gjatë verifikimeve u zbulua se shenjat e bllokimit ishin dëmtuar dhe në magazinë kishin mbetur vetëm 9.5 ton. Pjesa tjetër, rreth 94.5 ton, dyshohet se është shpërndarë në treg.

Shqetësimi kryesor lidhet me mungesën e gjurmueshmërisë së këtij produkti. Deri tani nuk është bërë e ditur se ku ka përfunduar sasia e misrit të kontaminuar, cilat ferma blegtorale mund ta kenë përdorur dhe nëse produktet e qumështit të prodhuara prej tij mund të përbëjnë rrezik për shëndetin e konsumatorëve për shkak të nivelit të lartë të aflatoksinës./ JOQ Albania

“KORÇA BOOM”