“Mos ndëshkoni një qytet të tërë”/ Historia e tubimit paqësor të Korçës

Një tubim paqësor u zhvillua në Korçë në mbështetje të ekipit të futbollit Skënderbeu Korçë, një moment që ka mbetur i gjallë në kujtesën e qytetit. Kjo ndodhi rreth 10 vite më parë, në një periudhë të vështirë, kur dënimi ndaj klubit tronditi jo vetëm skuadrën, por mbarë komunitetin sportdashës.

Në atë kohë, qytetarë të shumtë dolën së bashku me një mesazh të qartë: “Ne e duam futbollin” dhe “Mos ndëshkoni një qytet të tërë”. Ishte një thirrje që vinte nga zemra, një reagim qytetar që tregonte se futbolli në Korçë nuk është thjesht një lojë, por pjesë e identitetit dhe krenarisë së saj.

Megjithatë, realiteti mori rrjedhën e tij dhe dënimi u vu në zbatim. Sot, pas një dekade të gjatë sfidash, jemi në vitin e fundit të atij ndëshkimi që la gjurmë në historinë e klubit. Ishin vite sakrifice, pritjeje dhe shprese për rikthim.

Pavarësisht vështirësive, Korça dëshmoi se është një qytet që e do futbollin pa kushte.

Mbështetja për Skënderbeun nuk u shua, përkundrazi, u forcua edhe më shumë. Sepse në fund, mbi çdo dënim apo periudhë të errët, mbetet dashuria për fanellën dhe besimi se ditët më të mira do të rikthehen.

"KORCA BOOM"