Ndahet nga jeta Hirësia e Tij Dhimitri – Një jetë në shërbim të Zotit dhe Kishës

Me hidhërim të thellë është njoftuar ndarja nga jeta e Hirësisë së Tij, Mitropolitit të Gjirokastrës, Imzot Dhimitri. Ai ndërroi jetë mbrëmjen e 28 qershorit 2025, në orën 20:30, në Spitalin e Përgjithshëm Universitar të Janinës, pas një sëmundjeje të rëndë. Shkaku i ndarjes së tij nga jeta ishte një infeksion respirator i ndërlikuar me endokardit, që solli pamjaftueshmëri të shumë organeve.

Imzot Dhimitri lindi në shtator të vitit 1940 në Serres të Greqisë. Kreu studimet në Fakultetin e Teologjisë pranë Universitetit “Aristoteli” në Selanik dhe më pas iu përkushtua jetës monastike në Manastirin e Shën Ekaterinës në Malin Sinai, ku u bë murg në vitin 1974.

Në vitin 1991, iu bashkua Kishës Orthodhokse Autoqefale të Shqipërisë dhe u bë një nga bashkëpunëtorët më të afërt të Kryepiskopit Anastas. Nga viti 1994 shërbeu si Protosingjel i Mitropolisë së Gjirokastrës, ndërsa më 11 nëntor 2006 u zgjodh Mitropolit i kësaj eparkie. U dorëzua episkop më 16 nëntor dhe u fronëzua më 26 nëntor 2006 në Kishën e Shenjtë të Kryeengjëjve në Gjirokastër.

Për 19 vite me radhë, Mitropoliti Dhimitri udhëhoqi me përkushtim të lartë dhe shpirt të palodhur ringritjen e jetës kishtare në Jugun e Shqipërisë. Njihej për angazhimin në ndërtimin dhe rindërtimin e kishave, forcimin e besimit përmes mësimeve biblike, ndihmën ndaj të varfërve dhe mbështetjen e të rinjve përmes programeve arsimore dhe shpirtërore.

Ai ishte një njeri me kulturë të gjerë, thellësi teologjike dhe dashuri të pakushtëzuar për besimtarët.

Shërbeu gjithashtu si Zëvendëskryetar i Fondacionit Arsimor “Fryma e Dashurisë”, ku dha një kontribut të rëndësishëm në zhvillimin e arsimit orthodhoks në vend.

Shërbesa e përshpirtjes (trisaia) u mbajt në kishëzën e Kryepiskopatës në Tiranë. Ceremonia e varrimit do të zhvillohet më 1 korrik 2025, në orën 11:00, në Katedralen “Ngjallja e Krishtit” në Gjirokastër, ku besimtarët do të kenë mundësinë ta përcjellin Hirësinë e Tij në banesën e fundit.

I përjetshëm qoftë kujtimi i tij!

“KORÇA BOOM”