Ndërtimi jep sinjalin e parë të fortë të ngadalësimit, çfarë po ndodh me kërkesën për apartamente?

Sektori i ndërtimit në Shqipëri po përballet me sinjale të ngadalësimit të aktivitetit, ndërsa të dhënat e fundit të Bankës së Shqipërisë tregojnë një rënie të ndjeshme të besimit gjatë muajit tetor 2026.

Sipas vrojtimit të Bankës së Shqipërisë, Treguesi i Besimit në Ndërtim (TBN) u ul me 5.7 pikë përqindje brenda një muaji, duke regjistruar rënien më të fortë ndër sektorët e ekonomisë. Kjo ecuri ka ndikuar edhe në frenimin e Treguesit të Ndjesisë Ekonomike në vend.

Rënie e ndjeshme e kontratave të reja

Një nga sinjalet kryesore të dobësimit të sektorit lidhet me kontratat e reja. Balanca e kontratave porositëse ra nga -15 pikë përqindje në shtator, në -24.9 pikë përqindje në tetor.

Paralelisht, është rritur edhe numri i kompanive që raportojnë kërkesë të pamjaftueshme për aktivitetin e tyre. Në tetor, 45.93% e firmave të ndërtimit e identifikuan kërkesën e dobët si një faktor kufizues, krahasuar me 42.75% në muajin shtator.

Të dhënat tregojnë për një dobësim të kërkesës dhe një ngadalësim të aktivitetit në sektor. Edhe treguesi i aktivitetit aktual në ndërtim ka shënuar rënie, duke zbritur në 13 pikë.

Ndryshojnë pritshmëritë për çmimet

Rënia e kërkesës duket se ka ndikuar edhe në pritshmëritë e ndërtuesve për çmimet e ardhshme.

Treguesi i pritjeve për çmimet u ul në 11.8 pikë, duke sinjalizuar se kompanitë kanë më pak pritshmëri për rritje të mëtejshme të çmimeve të pasurive të paluajtshme.

Megjithatë, sektori i ndërtimit vijon të qëndrojë mbi mesataren e tij historike, pas rritjes së regjistruar në vitet e fundit.

Rënia e besimit, dobësimi i kontratave të reja dhe shtimi i firmave që raportojnë kërkesë të pamjaftueshme përbëjnë sinjale të rëndësishme për ecurinë e sektorit në muajt në vijim.

“KORÇA BOOM”