Nga 1 janari ndryshon siguracioni i makinave, a do të paguash më shumë?

Ndryshime të rëndësishme pritet të hyjnë në fuqi nga 1 janari 2025 në sistemin e sigurimit të detyrueshëm për automjetet në Shqipëri. Sipas rregullores së re të miratuar nga Autoriteti i Mbikëqyrjes Financiare, siguracioni nuk do të ketë më një tarifë fikse për të gjithë drejtuesit e mjeteve, por do të përcaktohet sipas profilit individual të çdo shoferi dhe karakteristikave të mjetit.

Nga viti i ardhshëm, çmimi i siguracionit do të llogaritet bazuar në shtatë faktorë kryesorë: historia e aksidenteve e drejtuesit, fuqia motorike e automjetit, mosha e drejtuesit, përvoja në drejtim, përdorimi i mjetit (personal apo për aktivitet ekonomik), qarku ku është i regjistruar mjeti dhe mosha e automjetit.

Kjo do të thotë se shoferët me histori të pastër dhe përvojë të gjatë në drejtim mund të përfitojnë siguracion më të lirë. Ndërkohë, drejtuesit e rinj, ata që kanë shkaktuar aksidente, apo ata që zotërojnë makina të vjetra dhe më të fuqishme, mund të përballen me çmime më të larta.

Për shembull, drejtuesit e mjeteve të regjistruara në qarqe me rrezikshmëri më të ulët, si Dibra, Kukësi apo Berati, pritet të paguajnë më pak në krahasim me ata në zona më të ngarkuara si Tirana apo Durrësi. Po ashtu, për një automjet me motor të fuqishëm dhe drejtues pa përvojë, çmimi i siguracionit mund të rritet deri në 30 për qind krahasuar me vitin aktual.

Rregullorja e re kërkon gjithashtu transparencë nga kompanitë e sigurimeve, të cilat janë të detyruara të publikojnë metodologjinë që përdorin për llogaritjen e tarifave dhe koeficientët përkatës.

Ky ndryshim synon të rrisë drejtësinë dhe personalizimin në sistemin e sigurimeve, duke shpërblyer shoferët e kujdesshëm dhe duke vendosur më shumë përgjegjësi mbi ata që kanë histori problematike në drejtim.

"KORÇA BOOM"