Një djalë 18-vjeçar, premtim i futbollit, ndahet nga jeta në mënyrë tragjike

Një ngjarje tragjike ka tronditur botën e futbollit brazilian. Futbollisti i ri, Wanderson Brandão de Sousa, vetëm 18 vjeç, ka humbur jetën aksidentalisht pasi është qëlluar nga vëllai i tij i vogël me një pushkë, teksa ky i fundit po e pastronte armën në shtëpi.

Sipas mediave vendase, rrethanat e sakta të ngjarjes ende nuk janë të qarta, ndërsa autoritetet kanë nisur hetimet për të zbardhur plotësisht rastin. Arma e përdorur në incident është sekuestruar nga policia për ekspertizë balistike, ndërsa familja dhe dëshmitarët po merren në pyetje.

Pas kësaj ngjarjeje të rëndë, klubi ku ishte aktivizuar 18-vjeçari ka pezulluar përkohësisht të gjitha aktivitetet sportive. Po ashtu, janë organizuar homazhe në nder të tij, ku kanë marrë pjesë familjarë, miq dhe bashkëlojtarë të cilët e kanë kujtuar si një djalë të qetë, të përkushtuar dhe me një pasion të madh për futbollin.

“Klubi Sportiv Piauí po përjeton një moment trishtimi të thellë për humbjen e sulmuesit tonë të ri, Antonio Illano, i cili humbi jetën në një aksident. Illano ka qenë pjesë e klubit që prej vitit 2024 dhe ka garuar në Kampionatin Piauíense U20, Sao Paulo Junior Cup dhe Northeast U20 League. Ai ishte gati të udhëtonte me ekipin në Copa Brasil Sub-20,” – thuhet në deklaratën zyrtare të klubit.

Ngjarja ka shkaktuar pikëllim të thellë në komunitetin sportiv brazilian. Federata Rajonale e Futbollit dhe disa ekipe rivale kanë dërguar mesazhe ngushëllimi për familjen dhe klubin, duke e cilësuar vdekjen e 18-vjeçarit si një humbje të madhe për futbollin e të rinjve në Brazil.

"KORCA BOOM"