Një jetë e humbur në duart e gabura: Çfarë ndodhi me 22-vjeçaren në klinikën estetike?

Marco dhe Marco Antonio Procopio, baba e bir dhe të dy kirurgë estetikë, do të duhet të mbyllin klinikën e tyre, pasi po përballen me akuza për vdekjen e Margaret Spada, 22-vjeçares që humbi jetën më 4 nëntor gjatë një procedure rinoplastike.

Gjykatësi hetues ka urdhëruar që ata të ndalohen nga ushtrimi i profesionit për një vit. Kjo masë është në fuqi si në Itali, ashtu edhe jashtë vendit, ku Procopio-t janë zhvendosur pas nisjes së procedurave gjyqësore.

Ata përfaqësohen nga avokati Domenico Oropallo.

Prokurorja Eleonora Fini kërkoi arrestimin e babait dhe pezullimin e të birit. Gjykatësi vendosi se, duke qenë se kishte kaluar gati një vit nga ngjarja, masat kufizuese ndaj lirisë personale nuk ishin më të zbatueshme. Pezullimi u konsiderua i mjaftueshëm për të parandaluar ngjarje të ngjashme në të ardhmen.

Familja e vajzës, përfaqësuar nga avokati Alessandro Vinci, kërkon që të sqarohet nëse ndihma mjekësore emergjente, po të ishte dhënë në kohë, do t’i kishte rritur shanset për mbijetesë Margaretës.

Sipas hetimeve të kryera nga karabinierët, është rindërtuar me saktësi momenti kur ndodhi vonesa fatale. Ata analizuan një fotografi të bërë në sallën e operacionit nga i dashuri i viktimës, ku Margaret shihet tashmë pa ndjenja, si dhe regjistrat e thirrjeve drejt numrave emergjentë 112 dhe 118.

Gjatë asaj gjysmë ore, defib

rilatori nuk u përdor, megjithëse ishte i pranishëm në sallë. Problemi ishte se bateritë e tij ishin të shkarkuara. Në vend të tij, u krye masazh kardiak dhe u bë përpjekje për të thithur lëngjet nga mushkëritë. Nëse defibrilatori do të ishte përdorur, vajza do të duhej të transportohej me urgjencë në spital, gjë që mund të kishte zbuluar menjëherë natyrën e vërtetë të ngjarjes.

Ekspertiza mjeko-ligjore, e cila zgjati dhjetë muaj dhe përfshiu pesë specialistë, përfshirë një patolog, konfirmoi se prerja në hundën e viktimës ishte shenjë e qartë e një ndërhyrjeje kirurgjikale të kryer në një institucion jo të certifikuar për këtë lloj procedure.

Ekziston edhe dyshimi se mjekët kanë vonuar qëllimisht njoftimin e emergjencës, ndoshta nga frika se aktivitetet e tyre të palicencuara do të zbuloheshin, ose për të shmangur procedurat ligjore që do të pasonin.

Prokurorja Eleonora Fini ka kundërshtuar pretendimet e mbrojtjes gjatë seancës përpara gjyqtares hetuese Daniela Caramico D’Auria, e cila pritet të vendosë përfundimisht në lidhje me kërkesën për arrestimin e dy mjekëve dhe ndalimin e tyre nga ushtrimi i profesionit të mjekut.

“KORÇA BOOM”