“Nuk do të harrohet”, reagimi i dhimbshëm i Elbasanit për humbjen e 22-vjeçarit

Ndarja tragjike nga jeta e futbollistit të ri Fatjon Bunjaku ka tronditur komunitetin sportiv shqiptar. Pas lajmit të rëndë për humbjen e 22-vjeçarit në një aksident rrugor në aksin Prishtinë–Mitrovicë, kanë ardhur reagimet e AF Elbasanit dhe presidentit të Federatës Shqiptare të Futbollit, Armand Duka.

Klubi i AF Elbasanit ka shprehur dhimbjen e thellë për humbjen e një prej futbollistëve të tij, duke e cilësuar si një goditje të rëndë për të gjithë familjen verdheblu. Në mesazhin e publikuar, klubi vlerëson përkushtimin, pasionin dhe kontributin që Bunjaku dha gjatë kohës që ishte pjesë e skuadrës.

“Me dhimbje të thellë morëm lajmin për ndarjen nga jeta të lojtarit tonë, Fatjon Bunjaku. Përkushtimi dhe pasioni i tij për futbollin do të mbeten gjithmonë pjesë e identitetit tonë. Fatjoni nuk do të harrohet”, thuhet në reagimin e klubit.

Edhe kreu i futbollit shqiptar, Armand Duka, ka shprehur ngushëllimet e tij për familjen dhe të afërmit e futbollistit, duke e cilësuar ngjarjen si një humbje të madhe për sportin shqiptar.

“Me pikëllim të thellë mora lajmin për ndarjen e parakohshme nga jeta të Fatjon Bunjakut, një djalë i ri me një të ardhme të tërë përpara. Ngushëllimet më të sinqerta familjes, miqve dhe klubit të Elbasanit”, është shprehur Duka.

Vetëm 22 vjeç, Fatjon Bunjaku konsiderohej një futbollist me potencial dhe perspektivë, ndërsa largimi i tij i parakohshëm ka lënë pas dhimbje të madhe te familjarët, miqtë, bashkëlojtarët dhe gjithë komuniteti i futbollit.

“KORÇA BOOM”