Panik në mesnatë, flakët përfshijnë apartamentin me 4 persona brenda

Një ngjarje e rëndë është shmangur në orët e para të mëngjesit në Tiranë, ku një familje me katër anëtarë është shpëtuar nga flakët falë ndërhyrjes së shpejtë të shërbimit zjarrfikës.

Ngjarja ka ndodhur rreth orës 03:03 në rrugën “Bernard Bilota”, në zonën e njohur si Pallatet e Arabit, në hyrje të Laprakës. Sipas informacioneve paraprake, zjarri ka përfshirë apartamentin ku ndodheshin dy prindër dhe dy fëmijët e tyre të vegjël.

Mes ankthit dhe panikut, evakuimi i familjes është realizuar nga ballkoni i komshiut, duke shmangur në minutat e fundit një tragjedi të mundshme.

Falë reagimit të menjëhershëm dhe ndërhyrjes në kohë të forcave zjarrfikëse, të katër anëtarët e familjes janë nxjerrë në kohë nga banesa dhe fatmirësisht nuk raportohet për persona të lënduar.

Rrethanat dhe shkaqet e rënies së zjarrit mbeten ende nën hetim.

“KORÇA BOOM”