Pankina e Lushnjës pret një emër të njohur. Ish-mbrojtësi i Skënderbeut në pole-position

Ditmar Bicaj është një nga emrat më të përfolur për të marrë drejtimin e pankinës së Lushnjës. Ish-mbrojtësi i njohur, i cili në sezonin e kaluar drejtoi Burrelin, ka konfirmuar se është në bisedime me drejtuesit e klubit lushnjar.

Largimi i trajnerit aktual, Erion Xhafa, u bë zyrtar ditën e djeshme, pasi ky i fundit dha dorëheqjen për arsye personale. Në rast se arrihet marrëveshja me Bicajn, ai do të rikthehej në Kategorinë e Parë, aty ku sezonin e kaluar arriti gjysmëfinalen e “play-off”-it me Burrelin.

Aktualisht Lushnja ndodhet në një situatë të pazakontë në tabelë: pas katër javësh kampionat, ekipi ka grumbulluar katër pikë, të gjitha të ardhura nga katër barazime radhazi. Një fillim që tregon stabilitet në mbrojtje, por që ka nevojë për më shumë guxim në fazën sulmuese.

Bisedimet me Bicajn pritet të konkretizohen së shpejti, dhe nëse palët gjejnë gjuhën e përbashkët, do të jetë një sfidë e re për trajnerin që kërkon të lërë gjurmë edhe jashtë fushës së lojës.

“KORÇA BOOM”