Peticioni që vë në lëvizje bashkinë, çfarë po ndodh me Akademinë e Futbollit Skënderbeu
Pakënaqësitë për mënyrën e funksionimit të Akademisë së Futbollit “Skënderbeu” në Korçë kanë marrë përmasa të reja. Mbi 140 prindër kanë nënshkruar një peticion kundër rritjes së tarifës mujore për stërvitjen e fëmijëve, duke ngritur një sërë shqetësimesh për kostot, kushtet dhe mënyrën e administrimit të akademisë.
Peticioni, i drejtuar fillimisht Këshillit Bashkiak të Korçës, ka mbërritur te drejtuesit e bashkisë. Ditën e hënë, kryetari i Bashkisë së Korçës, Sotiraq Filo, ka pritur një përfaqësi prej rreth 40 prindërish, të cilët kanë paraqitur pretendimet e tyre lidhur me funksionimin e akademisë.
Një nga çështjet kryesore të diskutuara në takim ka qenë dokumentacioni financiar i paraqitur nga klubi “Skënderbeu”. Sipas të dhënave të bëra publike nga palët, klubi pretendon se aktiviteti i akademisë rezulton me humbje financiare.
Një prej argumenteve të paraqitura nga klubi lidhet me faktin se, nga 294 fëmijë të përfshirë në ekipet e akademisë, për 68 prej tyre nuk janë kryer pagesat. Po ashtu, është përmendur edhe rritja e pagave të trajnerëve si një prej faktorëve që ndikojnë në kostot e aktivitetit. Nga ana tjetër, prindërit kanë kundërshtuar këto argumente, duke ngritur pikëpyetje mbi mënyrën e përllogaritjes së shpenzimeve.
Një prej pyetjeve të ngritura prej tyre lidhet me faktin se përse akademia nuk deklaronte humbje kur tarifa mujore ishte 2,500 lekë, ndërsa tashmë, me rritjen e saj në 5,000 lekë, bilanci paraqitet negativ.
Sipas përllogaritjeve të paraqitura në këtë debat, të ardhurat mujore nga pagesat e akademisë mund të arrijnë rreth 1.6 milionë lekë të reja. Megjithatë, shifrat dhe pretendimet financiare kërkojnë verifikim përmes dokumentacionit të plotë të aktivitetit.
Prindërit: Pagesat nuk justifikojnë kushtet
Përtej tarifës mujore, prindërit kanë ngritur shqetësime edhe për cilësinë e stërvitjes, kushtet e ambienteve sportive dhe higjienën. Sipas tyre, pavarësisht pagesave që kryejnë, një pjesë e nevojave dhe shpenzimeve për fëmijët përballohen nga vetë familjet.
Një prej shqetësimeve më të forta lidhet me mungesën e ambienteve sanitare pranë fushës së stërvitjes. Një nga nismëtarët e peticionit ka pretenduar se fëmijët nuk kanë një tualet ku të kryejnë nevojat personale, duke e cilësuar këtë një problem serioz për kushtet në të cilat zhvillohet aktiviteti sportiv.
Prindërit kërkojnë më shumë transparencë për mënyrën se si përdoren të ardhurat e mbledhura dhe çfarë shërbimesh financohen nga tarifat mujore që paguajnë.
Kërkohet pasqyrë e detajuar financiare
Nga takimi me kryebashkiakun Sotiraq Filo, sipas të dhënave të bëra publike, është rënë dakord në parim që klubit “Skënderbeu” dhe akademisë së tij t'u kërkohet një pasqyrë e detajuar financiare, për të sqaruar të ardhurat, shpenzimet dhe arsyet e bilancit negativ të deklaruar.
Një tjetër pikë që mbetet për t'u sqaruar është se kush e ka marrë vendimin për rritjen e tarifës mujore: bordi i klubit apo drejtues të veçantë.
Prindërit presin një reagim nga presidenti i klubit, Ardian Takaj, si dhe ndërhyrjen e bashkisë për të gjetur një zgjidhje që merr parasysh shqetësimet e familjeve dhe nevojat e fëmijëve që stërviten në akademi.
Për momentin, çështja mbetet e hapur, ndërsa transparenca financiare dhe përmirësimi i kushteve të stërvitjes janë ndër kërkesat kryesore të prindërve.
“KORÇA BOOM”
