Pogradeci me fitore në transfertë, Zguro sfidon rivalët: “Jemi një skuadër që nuk i druhet askujt

Pas një fillimi sezoni me ulje-ngritje, Pogradeci është rikthyer fuqishëm këtë javë duke marrë një fitore të rëndësishme në transfertë, që i rindez shpresat për një ngjitje të mundshme në Kategorinë Superiore. Edhe pse momentalisht ndodhen pesë pikë larg vendit të parë, entuziazmi në kampin liqenor nuk mungon.

Kapiteni i skuadrës, Vangjel Zguro, në një prononcim për mediat është shprehur i bindur se ekipi ka kohë dhe cilësi për të përmbysur këtë diferencë.

“Është e vërtetë që kemi një diferencë prej pesë pikësh, por kjo nuk na tremb aspak. Ka ende shumë ndeshje përpara dhe jam i sigurt që do t’i rikuperojmë. Nuk kemi asnjë lloj inferioriteti ndaj ekipeve të tjera pretendente,” – tha Zguro.

Ai rikujtoi disa prej ndeshjeve kyçe ku fati nuk ka qenë në anën e Pogradecit, duke përmendur takimin e humbur me Skënderbeun në minutat shtesë, si dhe fitoren e arritur ndaj Laçit – dy ekipe me objektiva të qarta për elitën e futbollit shqiptar.

“Ndeshjen ndaj Skënderbeut e humbëm në kohën shtesë dhe mund ta kishim fituar. Po ashtu, kemi mposhtur Laçin, një tjetër skuadër pretendente. Këto janë sinjale që na japin besim,” – shtoi kapiteni.

Zguro shprehu bindjen se, me kalimin e javëve, forma e ekipit do të vijë në rritje dhe se Pogradeci do të jetë mes kandidatëve kryesorë për ngjitjen në Superligë.

“Kam shumë besim te loja jonë. Nga java në javë do të jemi gjithnjë e më shumë në krye të renditjes,” – përfundoi Zguro.

“KORÇA BOOM”