Rama: Ksamili nuk mund të jetë më pre e injorantëve. Shërbim mizerabël dhe çmime që dëmtojnë turizmin

Gjatë një aktiviteti të mbajtur më 4 shtator 2025, ku u vendosën piketat e rrugëtimit të ardhshëm turistik të vendit, Kryeministri Edi Rama dha një mesazh të fortë lidhur me mënyrën si po menaxhohen disa prej plazheve më të njohura të Shqipërisë, me theks të veçantë te Ksamili.

Duke e cilësuar si një “plazh të dhunuar”, Rama tha se Ksamili është kthyer në një shembull negativ të keqadministrimit, ku çmimet e larta dhe shërbimi i dobët po dëmtojnë rëndë imazhin e turizmit shqiptar. Ai u shpreh se ky destinacion nuk mund të jetë më në dorën e atyre që e shohin si një mundësi fitimi pa asnjë standard apo përgjegjësi.

“Ksamili nuk mund të jetë më pre e injorantëve që e shohin si tokë për t’u pushtuar dhe për të trajtuar turistët si skllevër”, u shpreh Rama, duke kritikuar nivelin e ulët të shërbimeve dhe çmimet e pajustifikuara që vendosen në mënyrë abuzive.

Plazhet duhet të rikthehen në administrimin e bashkive

Kryeministri propozoi që plazhet e frekuentuara si Ksamili dhe të tjera që janë kthyer në burim stresi për vizitorët, të mos mbeten më në administrim të subjekteve private, por t’i kalojnë bashkive lokale. Ai përmendi shembullin e Himarës, ku administrimi nga bashkia është bërë sipas standardeve, me çadra të unifikuara dhe shërbime të kontrolluara.

“Nuk ka arsye që plazhi publik i Ksamilit të jetë privat, ku dendësia është e lidhur me stresin dhe një shërbim mizerabël. Duhet t’i shërojmë plazhet nga kjo dhunë e përditshme”, u shpreh Rama.

Diferencim i qasjes sipas përmasave të plazheve

Kreu i qeverisë bëri dallim mes plazheve të vegjël dhe atyre të mëdhenj si Durrësi, Shëngjini apo Velipoja. Sipas tij, ndërsa plazhet më të vogla mund të administrohen plotësisht nga bashkitë, për plazhet e mëdha duhet të vijojë bashkëpunimi me privatët, por në përputhje me praktikat më të mira dhe standardet e shërbimit.

Rama nënvizoi se bashkëpunimi publik-privat nuk duhet të bazohet në abuzime, por në kritere të qarta dhe në ofrimin e një shërbimi cilësor që përputhet me pagesën që qytetari bën.

“KORÇA BOOM”