Shoqërohet nga policia Arben Kola, çfarë ndodhi gjatë protestës

Forca të shumta të Policisë së Shtetit kanë shoqëruar aktivistin Arben Kola dhe një protestues tjetër gjatë protestës së zhvilluar këtë të hënë në Tiranë.

Shoqërimi i tyre ndodhi në zonën pranë Rrugës së Elbasanit, pasi protestuesit ndryshuan itinerarin e marshimit për shkak të bllokadës së vendosur nga policia përpara godinës së Parlamentit. Fillimisht ata marshuan përgjatë Bulevardit “Dëshmorët e Kombit”, për të vijuar më pas drejt Unazës së Madhe.

Protestuesit u pozicionuan pranë kryqëzimit të Rrugës së Elbasanit, ku u regjistruan edhe shoqërimet e para nga efektivët e policisë gjatë tubimit.

Deri në këto momente nuk janë bërë publike arsyet e shoqërimit të Arben Kolës dhe protestuesit tjetër, ndërsa Policia e Shtetit nuk ka dhënë ende një reagim zyrtar lidhur me këtë veprim.

Protesta vijon në zonë, ndërsa një numër i konsiderueshëm forcash policore mbeten të angazhuara për garantimin e rendit dhe menaxhimin e situatës.

“KORÇA BOOM”