Rama: “Shqipëria pa zëvendëskryeministër, do ta çojmë çështjen në Kushtetuese”

Kryeministri Edi Rama ka folur për herë të parë mbi situatën e zëvendëskryeministres Belinda Balluku, e cila është pezulluar nga detyra me vendim të Gjykatës së Posaçme.

Rama deklaroi se aktualisht vendi nuk ka as zëvendëskryeministër dhe as ministër të Infrastrukturës dhe Energjisë.

Ai theksoi se Qeveria do të respektojë vendimin e Shkallës së Parë, por paralajmëroi se çështja do të dërgohet për shqyrtim në Gjykatën Kushtetuese.

Sipas tij, pezullimi i Ballukut tregon dobësi të sistemit të drejtësisë dhe “reflekse antidemokratike”.

“Ky është një rast unikal në historinë e Europës dhe vendeve ish-komuniste. Nuk ka ndodhur kurrë që një prokuror dhe një gjyqtar të mblidhen kokë më kokë dhe të vendosin për pezullimin e një anëtari të qeverisë”, tha Rama.

Ai shtoi se vendimi i Shkallës së Parë cenon kompetencat e qeverisë, parlamentit dhe presidentit, por theksoi se qeveria nuk do t’i përgjigjet me të njëjtën monedhë:“Ne do të vazhdojmë me durimin tonë strategjik, duke respektuar pa kushte pezullimin e zëvendëskryeministres.”

Duke folur për sistemin e drejtësisë, Rama theksoi se pavarësia e gjyqësorit është një arritje historike, por paralelisht ka sjellë edhe probleme:“Pavarësia e gjyqësorit ka sjellë risi të rëndësishme dhe ka varrosur kulturën e pandëshkueshmërisë, por nga ana tjetër ka shfaqur reflekse antidemokratike.”

"KORCA BOOM"