Rama u përgjigjet kritikëve: "Në PS nuk ka regjim, të gjithë do të dëgjohen"

Kryeministri Edi Rama ka reaguar pas debateve dhe kundërshtimeve që kanë shoqëruar propozimin për reformën territoriale, duke theksuar se procesi është ende në fazën e konsultimit publik dhe se çdo mendim do të dëgjohet.

Përmes një reagimi publik, kreu i qeverisë ironizoi kritikat dhe zërat që flasin për pakënaqësi brenda Partisë Socialiste, duke i cilësuar ato si një "qarje halli" dhe një "agjitim të madh nga vajtorët e vajtojcat".

Rama theksoi se, përveç rastit të djegies së teserave të PS, të cilin e cilësoi si një akt të turpshëm, si edhe ndonjë reagimi individual të deputetëve, gjithçka tjetër është normale dhe madje e mirëpritur në një proces konsultimi.

Sipas tij, dokumenti i reformës ndodhet në periudhën 60-ditore të konsultimit publik, çka do të thotë se qytetarët, bashkitë dhe të gjitha palët e interesuara kanë të drejtë të shprehin lirisht qëndrimet e tyre.

Kryeministri nënvizoi gjithashtu se ligji u jep të drejtë kryetarëve të bashkive dhe këshillave bashkiakë të paraqesin me shkrim qëndrimet e tyre, ndërsa protestat paqësore janë të pranueshme për sa kohë nuk cenojnë rendin publik dhe nuk pengojnë jetën e qytetarëve.

Në reagimin e tij, Rama hodhi poshtë edhe pretendimet se në Shqipëri apo në Partinë Socialiste ekziston një regjim, duke garantuar se askush nuk do të pengohet të japë mendimin e tij për reformën.

Ai shtoi se gjatë 60 ditëve të konsultimit do të shpjegohen më gjerësisht arsyet që kanë çuar në propozimet për ndarjen e re administrative, duke theksuar se argumente që lidhen me traditat historike, reputacionin e zonave apo ngjarje të së kaluarës nuk mund të shërbejnë si bazë për vendimmarrje në këtë proces.

“KORÇA BOOM”