Rënia e qeverisë hap rrugën për një periudhë të trazuar dhe të paqartë drejtimi

Kryeministri francez François Bayrou ka pësuar një goditje të rëndë politike, pasi humbi votën e besimit në Asamblenë Kombëtare, duke i dhënë fund qeverisë së tij të pakicës. Me 364 vota pro dhe 194 kundër, deputetët vendosën ta shkarkojnë atë nga detyra, ndërsa 25 të tjerë abstenuan. Ky rezultat nënkupton se Bayrou pritet të dorëhiqet zyrtarisht ditën e nesërme, edhe pse përkohësisht do të vijojë detyrën si kujdestar deri në emërimin e pasardhësit.

Presidenti Emmanuel Macron përballet tani me një situatë të ndërlikuar politike. Ai ka disa skenarë në dorë: të emërojë një kryeministër të ri, të thërrasë zgjedhje të reja parlamentare ose të shpallë zgjedhje presidenciale.

Emërimi i një kryeministri të ri nuk është një detyrë e thjeshtë, pasi çdo kandidaturë duhet të fitojë mbështetjen e një prej fraksioneve të mëdha parlamentare, gjë që vitin e kaluar i mori Macron disa javë për ta zgjidhur. Nga ana tjetër, shpallja e zgjedhjeve të reja parlamentare mund të rrisë rrezikun e një fitoreje edhe më të madhe për Tubimin Kombëtar të Marine Le Pen, që është tashmë forca kryesore opozitare.

Një opsion tjetër, edhe pse i pakët në gjasa, është shpallja e zgjedhjeve presidenciale. Megjithatë, Macron nuk mund të rikandidojë, pasi mandati i tij i dytë përfundon në vitin 2027. Disa grupime parlamentare kanë kërkuar që ai të ndjekë këtë rrugë, por Presidenti francez e ka përjashtuar kategorikisht dorëheqjen.

Kjo situatë e re lë hapur shumë skenarë për të ardhmen politike të Francës dhe tregon edhe një herë përplasjen e fortë mes Presidencës dhe një Parlamenti të fragmentuar, ku kompromiset janë të vështira dhe balancat politike gjithnjë e më delikate.

“KORÇA BOOM”