Shpërthim në orët e para të mëngjesit në një bankë

Një shpërthim i fuqishëm ka tronditur orët e para të mëngjesit të së enjtes, ditën e Krishtlindjeve, një zonë të banuar të Evosmosit në Selanik. Ngjarja ka ndodhur rreth orës 03:20, pranë një dege banke e vendosur në kryqëzimin e rrugëve Karaoli dhe Dimitriou, duke shkaktuar dëme të shumta materiale dhe panik mes banorëve të zonës.

Sipas mediave greke, pajisja shpërthyese ishte vendosur jashtë ambientit të bankës, konkretisht në rrugën Salaminos. Shpërthimi ka qenë i fortë, duke thyer xhamat e degës bankare dhe duke shkaktuar dëmtime serioze në ambientet e brendshme të saj. Valët e shpërthimit janë ndjerë edhe në zonat përreth, duke dëmtuar automjete të parkuara dhe fasadat e pallateve të banimit që ndodhen pranë vendngjarjes.

Banorët e zonës janë zgjuar nga zhurma e fortë dhe kanë dalë të alarmuar nga banesat e tyre, ndërsa në vendngjarje kanë mbërritur menjëherë forca të shumta policie. Zona është rrethuar për arsye sigurie, ndërsa njësitë speciale dhe ekspertët e çaktivizimit të lëndëve shpërthyese kanë kryer kontrolle për të përjashtuar praninë e pajisjeve të tjera të dyshimta.

Fatmirësisht, nga shpërthimi nuk raportohet për persona të lënduar, por dëmet materiale janë të konsiderueshme. Autoritetet greke kanë nisur hetimet për të zbardhur rrethanat e incidentit dhe për të identifikuar autorët, ndërsa po analizohen pamjet e kamerave të sigurisë në zonë.

Ngjarja ka ngritur shqetësime për sigurinë, veçanërisht duke qenë se ka ndodhur në një ditë feste, ndërsa hetimet vijojnë për të hedhur dritë mbi motivet e mundshme të këtij shpërthimi. Në orët në vijim priten detaje të reja nga policia greke.

"KORCA BOOM"