Si u manipulua tenderi i rrugës Korçë–Ersekë: SPAK zbardh mesazhet mes Erion Isait dhe kompanisë fituese

Sipas burimeve nga SPAK, dosja penale është ndjekur nga prokurori Dritan Prençi dhe përfshin dy tendera të rëndësishëm: një për ndërtimin e një ujësjellësi dhe tjetri për ndërtimin e rrugës Korçë–Ersekë. Hetimet paraprake kanë zbuluar se dokumentacioni teknik është manipuluar në mënyrë të qëllimshme, me synim përfitime të paligjshme nga fondet publike.

Përveç Isait, në këtë çështje janë marrë nën procedim penal edhe shtatë persona të tjerë. Ndër ta ndodhen administratorë të shoqërive private që kanë qenë të përfshira në tenderat e shpallur nga Bashkia Kolonjë. SPAK dyshon se procedurat e prokurimit publik janë paracaktuar dhe favorizuar, duke i dhënë avantazhe të padrejta operatorëve të lidhur me zyrtarë lokalë.

Një pjesë kyçe e provave të mbledhura nga SPAK lidhet me komunikime të sekuestruara përmes aplikacionit WhatsApp midis kryebashkiakut Erion Isai dhe Entela Çanos, administratore e kompanisë “A & E Engineering”. Në këto biseda, sipas organit të akuzës, dallohet qartë një bashkëpunim për të ndryshuar parametrat tekniko-financiarë të projekteve në favor të interesave personale apo klienteliste.

Disa nga mesazhet e zbardhura nga hetimi tregojnë se Kryetari i Bashkisë ka udhëzuar drejtpërdrejt kompaninë për të reduktuar vlerat e zërave të punimeve, për të përshtatur projektet sipas nevojave të tij, si dhe për të përgatitur lista me emra banorësh që do të përfitonin nga investimet, ndonëse kjo pjesë duket të ketë qenë e përdorur për justifikim dokumentacioni.

Mesazhet përmbajnë udhëzime të qarta si: “Shifi pak këto... Po 110 max ose 90 i jep zgjidhje...”, “Sa më shpejt s’plis...”, apo “Zjarrr... Se nesër duhet me i printu t’i vulos...”, që dëshmojnë një koordinim të drejtpërdrejtë midis zyrtarit dhe kompanisë për të manipuluar të dhënat dhe dokumentet zyrtare të tenderave.

Në një tjetër mesazh, Isai kërkon lista të fshatarëve që do të përfitonin nga investimet, duke e shoqëruar kërkesën me shprehje si: “Një zjarri të lutem”, apo “Ju vell...”, që sipas SPAK, tregojnë nivelin e lartë të ndërhyrjes në procesin teknik.

Entela Çano, në përgjigje të këtyre kërkesave, pranon t’i bëjë ndryshimet, duke shkruar: “Do bëj më të mirën e mundshme... jam sforcuar shumë për të kapur vlerën...”, duke shtuar më tej një shprehje ironike: “Me 5 aspra tha ai do verë të mirë miku... shprehje gjermane.”

SPAK ka në dorë edhe dokumentacionin përkatës të tenderave, të cilët, sipas burimeve, përputhen me ndërhyrjet dhe kërkesat e dhëna në mënyrë jozyrtare nga zyrtarët e Bashkisë Kolonjë.

“KORÇA BOOM”