SKANDAL/ Kolapson rrjeti i “One Albania”, mijëra klientë pa telefonata dhe internet për orë të tëra

Mijëra abonentë të kompanisë celulare “One Albania” u përballën mbrëmjen e djeshme me ndërprerje të plotë të shërbimit, duke mbetur për orë të tëra pa telefonata dhe pa internet.

Prej më shumë se dy orësh, para mesnate, përdorues nga zona të ndryshme të vendit raportojnë se rrjeti i kompanisë nuk funksionon. Telefonatat nuk realizohen, ndërsa interneti celular nuk hapet. Në shumë raste telefoni shfaq rrjetin, por sistemi nuk lejon asnjë komunikim.

Situata ka shkaktuar reagime të shumta nga qytetarët, të cilët raportojnë se nuk mund të kryejnë as komunikimet më bazë. Shërbimi celular përdoret çdo ditë për punë, për komunikim familjar dhe për shërbime online, ndërsa ndërprerja e tij krijon probleme të drejtpërdrejta për përdoruesit.

Pavarësisht këtij problemi që prek mijëra abonentë, kompania “One Albania” nuk ka dhënë deri tani asnjë shpjegim publik për shkakun e ndërprerjes së rrjetit. Kompania nuk ka publikuar asnjë njoftim zyrtar dhe nuk ka informuar klientët se kur do të rikthehet normalisht shërbimi.

Kjo situatë ka ngritur pikëpyetje për përgjegjësinë e kompanisë ndaj klientëve të saj, të cilët paguajnë çdo muaj për paketat e komunikimit. Abonentët kërkojnë transparencë për arsyet e ndërprerjes dhe për mënyrën se si kompania do të trajtojë një problem që ka lënë për orë të tëra mijëra përdorues pa shërbim.

Ky incident nuk është i vetmi për kompaninë “One Albania”. Në vitet e fundit, abonentët kanë raportuar vazhdimisht probleme me cilësinë e rrjetit, ndërprerje të shërbimit dhe vështirësi në përdorimin e internetit celular. Çdo episod i tillë ka shtuar pakënaqësinë e klientëve dhe ka ngritur dyshime për stabilitetin dhe standardin e shërbimit që kompania ofron në tregun shqiptar të telekomunikacioneve./ Pamfleti

“KORÇA BOOM”